محمد رمضان: كنت بلعب كرة على مراهنات.. وروحت الأهلي وفشلت (فيديو)

قال الكابتن محمد رمضان، المدير الرياضي بالنادي الأهلي، إنه خرج من أسرة بسيطة فقيرة للغاية في حي إمبابة، وكان يسكن في البيت رقم 68، ووالده كان موظف أمن في شركة اللحوم والدواجن، أوائل السبعينيات وتم فصله.
وأضاف في حوار ل برنامج «كلم ربنا» الذي يُقدمه الكاتب الصحفي أحمد الخطيب، على الراديو «9090»: «كل ما أمر بظروف صعبة أفتكر رقم مهم من المرحلة دى وهو (68-44- 22- 10)، وتفسير الرقم هو 68 رقم البيت، 44 مساحة الشقة، 2 الدور، 2 جنيه أي الإيجار، 10 هو عددهم في الشقة: فلما بفتكره برضى بالوضع اللى أنا فيه، (يعنى كنت فين وبقيت فين)، وكنت رقم 6 بين أشقائي، فحياتي كانت معدمة، لكن محستش بالأزمة الاقتصادية للأسرة، لأنى كنت بلعب كرة على مراهنات، وأكسب 20 قرشا أو ربع جنيه، وكنت كل يوم حد استنى العيال اللى شغالين في الورش وألاعبهم وأكسبهم، فمحستش بالفقر، واخواتى مكملوش تعليم واحد متطوع في الجيش وواحد في ورشة أحذية واحنا 3 صبيان بس والباقي بنات».
وأشار إلى أنه «خلال الثمانينات، كان في العشرينات كان يلعب في نادى الترسانة، حينها مذيع سأله: مين (الخِلُّ الوَفِيُّ في حياتك)؟ في البداية فكرت في 3 أصدقائي، لكن في لحظة لقيت المذيع بيظن إنى مش عارف معنى الكلمة، لقتنى بقول: «ربنا»، فاستغرب، فقلتله: «هو أنا هلاقي أكرم وأحن وأقرب من ربنا فين، محدش هيبقي سندي غيره؟».
ولفت «رمضان»، إلى أن «الصديق مهما كان مخلصًا، فسيكون هناك تحفظ كبير في التعامل في الألفاظ والعلاقات، حتى أننا كل 10 سنوات نجد لدينا أصدقاء جدد، والقائمة تغيرت، لكن الله هو الثابت الذي لا يتغير، ووفقني في حياتي».
وأوضح «رمضان»، أنه التحق بنادي الترسانة بتوفيق من ربنا، مضيفا: «قبلها روحت الأهلى وفشلت، كنا نروح نلعب في إمبابة على الأسفلت، وقتها كان معايا صديقي سعيد (هو اللى كان يحرس لنا الحاجة لما نلعب)، تفاجأت به بيلعب في الترسانة، فسألته بتلعب إيه، قالى (باك رايت)، قلتله: «أنا هروح معاك أمشيك من الترسانة.. كان غل عيال صغيرين، فروحت اختبرت باك رايت، فنزلت لعبت كانت فرقة اسمها أبوسمبل فكسبنا 7/1 جبت منهم 6، فكان موجود كابتن مصطفى رياض مدرب سن ال15 وأشهر اللاعبين في تاريخ الترسانة، فاختارني».
وتابع: «فى سنة 1990 بعد الرجوع من كأس العالم، الكابتن محمود الجوهري قرر فتح باب الاحتراف، فكنت وقتها ينطبق على الشروط، فالتوفيق مصاحبنى من وأنا صغير، فروحت الأهلي».
وعن حياته الخاصة، قال: «مرة قعدت 18 شهر بدون شغل، ومعنديش أي دخل، فوصلت عند الشهر ال17 مراتى كان معاها دبلة دهب بس، ومعايا طارق وياسر، والأمور صعبة، وكنت خجلان في الأول أطلب من ربنا لأنه كان معايا، وكنا وقتها في 2022 وكنت وصلت 40 سنة وحياتى مستقرة، لغاية مراتى ما قالتلى مفيش غير الدبلة معايا، فبدأت أناجى ربنا: (اللهم فك كربي)، ففكها عليا بحاجات محلمش بيها.
وأضاف: «وفى الفترة دى أنا عمرى ما تخليت عن مساعدة أهلى، واستلفت فلوس عشان أمى وأبويا، وأنا رايح أديهم الفلوس حسيت إن في خبر كويس جاى، وقلت لمراتى كدة، كنا في 2003 فجانى شغل مدير الكرة في النادى المصري، فدى لحظة الفرج، لأنى طلبت رقم كبير ووافقوا عليه».
وتابع: «فى 2005 لقيت واحد بيتصل بيا بيقولى في برنامج رياضى (سوبر استارز)، بيضم لاعبين من دول مختلفة (زى فكرة ستار أكاديمي كدة)، فوافقت من غير ما أحدد راتب، فقالى هيكون 15 ألف، يعنى هيدينى 3 آلاف دولار، وبعدها روحت نادى المقاولون ب8 سنين (2008)، فعملت لائحة للشغل، وقعدت مع اللاعبية، وبعدها وديتها لمجلس الإدارة فحصلت أزمة، لكنها في النهاية وافقوا على اللائحة، فعدت في النادى أقول أبودبلوم صنايع خلى المهندسين يوافقوا على اللائحة، فافتكرت الآية وإنى بينت لهم، وإن لازم يكون عندى إيمان حقيقي بربنا».
اقرأ أيضًا:
كل الشركات سابتني.. بيج رامي: فلّست ورجعت مصر مكنش معايا مصاريف بيتي
مبروك تم إيداع 81 تريليون دولار في حسابك.. خطأ كارثي في أحد البنوك (فيديو)
عايدة رياض: تزوجت محرم فؤاد كيدًا في نجم نادي الزمالك (فيديو)
ب2 مليون جنيه.. إيناس الدغيدي تكشف حقيقة حصولها على حقنة كل 6 أشهر (فيديو)