«سيدة كرداسة»: «طلبت من زوجى مصاريف العيال.. صبّ عليّا البنزين وولع فيّا» (فيديو)

في البداية، كان طلبًا بسيطًا. «هات مصاريف البيت» قالتها «حنان» بصوتٍ مُنهك، بحذرٍ تعرفه إذ دائمًا ما كانت تخشى لحظة الغضب في عيون زوجها، لم تكن تتوقع أن يتحوَّل صوته إلى صواعق، وأن يتحوَّل وجهه إلى شرارة. في ثوانٍ، كانت الأرض تغرق برائحة البنزين، والسائل البارد يلتصق بجلبابها قبل أن يتحوَّل إلى لهبٍ يلتهمها، فإذ بزوجها «وائل»- مبيض المحارة، يهرب من مسكنهما بمنطقة كرداسة شمال الجيزة، لتلاحقه أجهزة الأمن، فيما ظلت المجنى عليها تصارع الموت وسط أبنائهما ال9.
«كنت حاسة إنى بختفي»
«مطلبتش حاجة كبيرة، كنت بس عايزة مصاريف العيال، لقمة ياكلوها، أي حاجة تسد جوعهم بعد صيام طوال اليوم بس هو غضب، كان دايمًا بيغضب، بس المرة دى كانت غير» تسكت حنان أحمد، تُبعد عينيها عن السقف المتهالك فوق رأسها، تتنفس بصعوبة، تكمل بصوت ضعيف يكاد يختفى وسط أصوات المطر المتساقط من الشقوق.
«سألته عن الفلوس، ماردش وشه كان متغير، ساكت بطريقة تخوف، فجأة، لقيت البنزين بيتكبّ عليّا حسّيته بارد على جسمى، لحظة واحدة، وبعدها النار كانت طالعة من كل حتة فيا»، تقول «حنان»، وتحاول أن ترفع يدها، لكنها لا تستطيع، قبل أن تضيف: «كنت بصرخ، أو يمكن كنت ساكتة مش عارفة، النار كانت أسرع منى كانت بتاكل (صدرى، وشى، ضهرى، كنت حاسة إنى بختفي)».
تشدد على الكلمات كأنها تحاول أن تُثبت لنفسها أنها لا تزال هنا، رغم أن كل شىء فيها يقول عكس ذلك، «محمد جرى علىّ، شدّنى، حاول يبعدنى عنه بس هو كان ورايا، ماسك ولاعة، شُفت النور بتاعها قدام عينى، وبعدها حسّيت بجسمى بيولع تاني».
«وجع النار كان رهيب بس وجع العيال كان أصعب»
تُغلق عينيها، تتوقف للحظة، كأنها تحاول ألا ترى ما حدث، لكنه حاضر، محفور في ذاكرتها مثل الحروق التي غطت جسدها، «كنت بسمع العيال بيصرخوا، والجيران بيجروا.. حد جاب بطانية، حد جاب مَيّه، رموا علىّ حاجات، حسّيت إن النار بتطفى.. بس النار اللى جوايا لسه شغالة».
تُحرّك يدها بصعوبة على الجلباب الذي يغطى جسدها، تتنهد، تكمل: «في المستشفى، قالوا لي لازم تتحجزي علشان تتعالجى، بس قلت لهم هروح بيتى وهكمل علاجى هناك»، باكية: «بس إزاي؟حالنا على قده، والبيت ماعادش بيت، وأنا ماعدتش حنان».
«أنا مش عايزة أشوف وشي»، تحاول أن تخفى وجهها، تضع طرف جلبابها فوق فمها، كأنها تحتمى به، «مش عايزة مراية، مش عايزة أشوف عارفة شكلي في عيون العيال، محمد ابنى بقى مابيبصليش، كل ما عيونه تيجى في عينى، يلفّ وشه وكنزى الصغيرة، اللى كانت بتنام في حضني، بقت بتستخبى منى».
تصمت قليلًا، ثم تكمل بصوت يزداد ضعفًا: «وجع النار كان رهيب بس وجع العيال وهم خايفين منى كان أصعب».
«محدش لينا غير ربنا»
تنظر إلى الزاوية التي يجلس فيها «محمد»، صامتًا، عيناه مثبتتان في الأرض، «كان بيصحى يلاقى الأكل قدامه، دلوقتى هو اللى بيدوّر عليه بيخرج يدور على شغل، يرجع آخر الليل، ماسك في إيده أي حاجة بيفضل ساكت، بس عينيه تعبانة بيحاول يضحك، بس الضحكة مش طالعة».
تخفض صوتها، كأنها تتحدث إلى نفسها: «صغير.. صغير قوى على اللى بيشيله فوق كتافه».
في الليل، وسط ظلام الغرفة، تسمع الصوت الذي يقطع قلبها كل يوم: «ماما، جعان»، تحاول أن تتجاهله، أن تخفى دموعها، لكن الألم أقوى من أي شىء آخر.
«الغرفة دى مابتعيش حد»، وتُشير إلى السقف، حيث تتساقط قطرات الماء ببطء، ترتطم بالأرض، تصنع بقعًا على الفرشة المبتلة.
«الريحة ماحدش يقدر يستحملها، ريحة دخان، ريحة بنزين، ريحة حريق، السقف بيخرّ كل ما المطر ينزل، الفرشة اللى كنا بننام عليها بقت مبلولة على طول والعيال بيناموا متكوّمين فوق بعض عشان يدفّوا نفسهم»، تشرح المجنى عليها حال أسرتها. تلتقط نفسًا متقطعًا، تُغمض عينيها للحظة، ثم تتابع: «زمان كنا فقرا، بس كنا عايشين ودلوقتى إحنا فقرا وبنموت كل يوم».
«محدش لينا غير ربنا» تُحرّك رأسها ببطء، تنظر إلى الباب، كأنها تتوقع أن يدخل منه أحد، لكن لا أحد يأتي.
«الشرطة تلاحق المتهم»
«بيقولوا إن الشرطة بتدوّر عليه.. بس حتى لو قبضوا عليه، ده هيغير إيه؟ هيرجع لى وشى؟ هيمسح الخوف من عيون العيال؟».. تتنهّد، تُمرر يدها على ضماداتها القديمة، التي بدأت تفقد تماسكها.
حزينة تروى «حنان»: «الجيران طيبين، بيحاولوا يساعدوا، بس هم كمان فقرا، حد جاب لى لقمة، حد جابلى دوا، حد جابلى بطانية، بس كل ده ما يكفّيش.. العيشة بقت نار، حتى من غير حريق».
تُغمض عينيها مرة أخرى، تحاول أن تهرب من الواقع، لكن الصوت نفسه يعود، يهمس في الظلام: «ماما، جعان».
أجهزة الأمن، استمعت لأقوال المجنى عليها وتلاحق المتهم في الأماكن التي يتردد عليها.