زوجة أمام محكمة الأسرة: «جوزي عايرني إني مش قادرة أخلف»

أقامت سيدة ربة منزل (26 سنة)، دعوى طلاق للضرر أمام محكمة الأسرة ضد زوجها (موظف) 29 سنة، لاستحالة العيش معه حسب وصف المدعية في صحيفة دعواها.
وقالت المُدعية خلال نظر محكمة الأسرة دعوى طلاق للضرر: «جوزي أخو صحبتي، وكنت أعرفه قبل الجواز، وتقدم لخطبتي ووافقت عليه، واتجوزته بعد سنتين ونصف خطوبة، وحاليًا على ذمته بقالي سنتين، وربنا لسه مارزقناش بأولاد لحد دلوقتي».
اقرأ أيضًا: سيدة أمام محكمة الأسرة: «أبوبناتي التلاتة رمانا بعد ما جاله الولد»
المُدعية: «نتيجة التحاليل صدمتني»
وتحدثت الزوجة أمام محكمة الأسرة : «معاملته كويسة معايا طول فترة الخطوبة، وأول 4 أشهر جواز كان بيعاملني بمعاملة تحفظ كرامتي، ولكن بعد تأخر حملي طول الفترة دي، طلب مني أعمل تحاليل عشان نطمن ونشوف أي السبب، ونتيجة التحاليل كانت صدمة بالنسبالي».
اقرأ ايضًا: زوجة في دعوى طلاق: «قالى لو عايزه تعيشى في أمان اخدمى أمى»
الزوجة: «تغير معي منذ معرفته بمرضي»
وأضافت المُدعية: «التحاليل أثبتت إن عندي مشكلة خلقية هتحتاح علاج لفترة كبيرة، واحتمالية الحمل ضعيفة في الفترة دي، ومن اللحظة دي بقى يقلل كلام معايا وتعامله ما بقاش طبيعي، أصبح يتجاهلني ويتعامل معي كأني أنا السبب، وإني حرماه من الخلفة بإرداتي».
اقرأ أيضًا: سيدة أمام محكمة الأسرة: «طالب والدتي بدفع ثمن الكشف والسونار»
السيدة: «عايرني بابتلاء ربنا ليا»
وأردفت: «كنت ملتزمة على تعليمات الدكتور، وبدعي ربنا إني أحمل عشان أخلف له الولد إللي نفسه فيه، وكنت بستحمل معاملته الجافة لي، ولكن أخر تحليل عملته كانت نتيجة إني مش هعرف أخلف خالص، فجوزي اتغير معايا وبيعاملني كأني مش فحياته فتكلمت معاه إني مليش سبب في الخلفة، وده ابتلاء ربنا لينا لازم نصبر، فرده عليْ صدمني، وعايرني إني مهما عملت مش هخلف، وعايرني بمرضي وابتلاء ربنا ليا، فطلبت منه الطلاق فرفض، فاضطريت أرفع دعوى طلاق للضرر ضده أمام محكمة الأسرة».