مهندسة أمام محكمة الأسرة: «جوزى شك إن فيه علاقة بيني وبين خطيب أخته»

نظرت محكمة الاسرة بالقاهرة، دعوي طلاق للضرر أقامتها مهندسة ضد زوجها، بعد تعديه عليها بالسب والضرب بسبب خطيب شقيقته.
تفاصيل الدعوي كما روتها الزوجة أمام خبراء التسوية بمحكمة الاسرة قالت فيها: أنا «اتجوزت من 7 سنين، جوزي كان مهندس زميلي في الشغل، وبعد 3 سنين جواز ربنا رزقنا ببنت وولد بقوا هم كل حياتي وكنا فرحانين بيهم جدا».
وأضافت الزوجة أمام مكتب تسوية النزاعات بمحكمة الاسرة: «حياتنا كانت حياة زوجية هادية ومافيهاش مشاكل غير المشاكل، والخلافات البسيطة اللي بينا موجودة بين أي زوجين، إلى أن تقدم عريس لأخت جوزي وفجأة وبدون مقدمات بدأت المشاكل وبشكل فعلا غريب».
وقالت مقيمة الدعوي في دعواها أمام محكمة الأسرة: «عريس أخت جوزي كان قريب صاحبة أختي الأنتيم، وكان بيعتبر كأن فيه سابق معرفة بيني وبينه، رغم إني ماشوفتوش ولا مرة في حياتي قبل تقدمه لخطبة أخت جوزي».
وتابعت: «كان بيتكلم معايا بود زيادة، وكان كتير يطلب من أخت جوزي إنها تأخد رأيي في أمور العفش وتجهيز الشقة، وساعات في بعض المشاكل اللي بتحصل بينهم، وده كان سبب في إنها تغير معاملتها معايا مش بس كده دي كمان قلبت أخوها عليا».
وأوضحت مقيمة الدعوي أمام خبراء محكمة الأسرة قائلة: «كنت بقول كل ده عادي وبعديها، لكن اللي صدمني فعلا هو جوزي، لما فوجئت بيه بيتخانق معايا ويقولي (في ايه بينك وبين خطيب أختي، انتي بتحبيه ولا إيه وعاوزه تخطفيه منها ؟)، عشان يكون ده السبب اللي أنهي حياتي معاه ودمر البيت».
وختمت قائلة: «ملقتش كلام أرد بيه على جوزي غير إني قولتله (طلقني)، فوجئت بيه بيضربني بالقلم على وشي قدام ولادي وبيسبني بأبشع الألفاظ، اخدت ولادي وسبت البيت وروحت بيت أهلي، وقررت اللجوء إلى محكمة الاسرة لإقامة دعوي طلاق بعد طلبه تنازلي عن حقوقي مقابل الطلاق.