«فيفا ممكن يشيل الفار من عندنا».. سمير عثمان يطالب بشطب هؤلاء بسبب أزمة مباراة الزمالك والبنك

علق سمير محمود عثمان، الخبير التحكيمي، على تسريب ما دار في غرفة الفار خلال مباراة الفريق الأول لكرة القدم بنادي الزمالك والبنك الأهلي في الجولة الأولى من بطولة الدوري الممتاز.
وقال سمير محمود عثمان، في تصريحات ببرنامج «ملعب أون تايم»، المذاع عبر فضائية «أون تايم سبورتس»: «انا مش هتكلم فني، احنا عندنا مشكلة أكبر، إزاي الموضوع ده وصل للإعلام وخرج بره لجنة الحكام، أنا بطلب من إبراهيم نور الدين، إن الحكم إللي سرب ما دار في كواليس غرفة الفار يتشطب، لأنه حكم غير أمين، لأنه سرب معلومات قبل أن تعرض على لجنة الحكام».
وأضاف: «الموسم أكيد هيكون فيه أخطاء، إنما الأمانة المطلوبة من الحكم افتقدها، موضوع كبير، ده لازم يتشطب، أنا بطلب من إبراهيم نور الدين، واتحاد الكرة، بشطب الحكم، أنا يهمني العقوبة الأدبية والشرفية، واحد طلع سر لازم يتشطب ولازم يتم الإعلان عن العقوبات».
وتابع: «مش شرط يكون محمد عادل، حكم المباراة اللي سرب المعلونة، ممكن اللي خرج المعلومة حكم الفار أو المساعد، ده لازم يتشطب ويتحاكم ده واحد غير أمين»، مضيفًا: «لازم يتم إجراء تحقيق كبير لمعرفة من سرب حديث الحكام في الفار، حتى شركة الفار اللي موجودة تتحاسب، لازم نعرف الفيديو خرج إزاي».
وواصل: «لازم نعرف التسجيل وصل ازاي للإعلام، حتى لو رئيس اتحاد الكرة اللي عمله يبقى غلط لو عضو مجلس إدارة الاتحاد اللي طلعه يبقى غلط، لو حد من لجنة الحكام، يتشطب، احنا بنتكلم في حاجة مهنية».
وأتم: «أنا بقالي 35 سنة في التحكيم عمر ما حاجة زي دي حصلت، الاتحاد الدولي لو عرف اللي حصل ممكن يشيل الفار من عندنا، احنا بنعمل اختراعات».