«وجودهم في الزمالك خسارة».. إبراهيم سعيد يفتح النار علي لاعبي الأبيض

علق إبراهيم سعيد، نجم النادي الأهلي ومنتخب مصر السابق، على هزيمة الزمالك من طلائع الجيش في كأس مصر، والخروج المبكر من البطولة الأقدم في مصر.
وقال إبراهيم سعيد خلال تصريحات تلفزيونية ببرنامجه على شاشة النهار: «بوجه رسالة لجماهير نادي الزمالك، أنتو مبسوطين بأداء فريقكم والخروج من بطولة كأس مصر، وكمان خسارة الدوري الممتاز بفارق كبير يتخطى ال25 نقطة».
وأضاف نجم الأهلي السابق: «مفيش ولا لعيب في نادي الزمالك كان كويس امبارح، دون لعيب وحيد وهو محمود الشناوي حارس المرمى، هو أفضل واحد في الفترة الأخيرة، وهو المكسب الوحيد في آخر شهر أو شهرين، مستوى ومستقبل كبير، وأنا بحترم اللعيبة دي».
وأكمل: «محمود الشناوي هو عكس لعيبة كتير في نادي الزمالك لبسين بس تيشيرت الزمالك، مش بيقدموا أي حاجة، مجرد أنه بيلعب معندوش ولا روح ولا إحساس بالمسؤولية عايز الماتش يخلص ويخسر عشان ياخد إجازة».
وتابع: «مفيش مستوى ولا إحساس أنهم عايزين يثبتوا نفسهم، ويبقوا موجودين مع فريق كبير بحجم نادي الزمالك، المفروض أني أطلع أقول اللعيبة كويسة وهما دون المستوى، يجماعة الكورة مفهاش عاطفة، مينفعش لعيبة تبقى مش موجودة وتاخد شهرة ومقابل».
وزاد: «هذكر أسامي لعيبة لا تصلح أن تكون موجودة في نادي الزمالك، زي ناصر منسي، لا تمركز ولا روح ولا مرونة ورشاقة، ومحمد أشرف روقا كمان مفيش مستوى ومفيش تطور، وده لعيب موجود بقالة فترة كبيرة، وحسام عبدالمجيد، ومهاب ياسر».
وأتم إبراهيم سعيد: «مفيش فرق بين لعيبة الزمالك كلهم، لازم الزمالك يمشي لعيبة كتير، تواجدهم في نادي الزمالك خسارة، خسران في الملعب وبرا الملعب ومن الناحية التسويقية، مشيهم حتى لو ببلاش».