«دخلت المستشفى بسببهم ومش مسامحهم».. مدافع الأهلي السابق يفتح النار على البدري وعبدالحفيظ

فتح أحمد العش، مدافع الأهلي والإسماعيلي ووادي دجلة السابق، النار على حسام البدري، المدير الفني السابق للفريق الأول لكرة القدم بالنادي الأهلي وسيد عبدالحفيظ، مدير الكرة السابق.
وقال أحمد العش، في تصريحات عبر إذاعة «أون سبورت إف إم»: «كنت في وادي دجلة، وفي الانتقالات الشتوية في 2019، تلقيت عرضًا من النادي الأهلي، كان يتبقى على انتهاء عقدي مع وادي دجلة ستة أشهر، لاقيت الكابتن حسام البدري، بيكلمني وقالي (إحنا عايزينك في النادي الأهلي، لأن كان في أزمة في خط الدفاع)، وأكدت له إني أرحب بالعودة للأهلي مرة أخرى، ولم أفرض أي شروط مادية».
وأضاف: «سيد عبدالحفيظ، بعدها كلمني وقالي (هنتواصل مع بعض لحين حسم الصفقة)، تاني يوم أبلغت مسؤولي نادي وادي دجلة، إني تلقيت عرض من الأهلي والمهندس ماجد سامي، رئيس النادي قالي (مش هنقف في طريقك) وفي نفس اليوم، ماجد سامي، كلمني وقالي إن الكابتن محمود الخطيب، كلمه واتفقوا على كل شيئ».
وتابع: «كلمت سيد عبدالحفيظ، قالي (الموضوع خلص ويتبقى فقط بعض الإجراءات)، تاني يوم الكابتن سيد، كلمني وطلب مني الذهاب لنادي وادي دجلة للتوقيع على الاستغناء»، مضيفًا: «مضيت على الاستغناء وتنازلت عن فلوسي لنادي وادي دجلة، وكان مفروض تاني يوم أروح النادي الأهلي للتوقيع على العقود، ولكن يومها بليل البرامج الرياضية كانت تتحدث عن فشل الصفقة».
وأكمل: «كلمت الكابتن سيد، قالي (في مشكلة بين حسام البدري، وأحد الأشخاص في الإدارة، بس إن شاءالله هتتحل ومتركزش في الكلام ده)».
وواصل: «بعد كده لاقيت كلامه معايا كل يوم بيقل، كان بيكلمني في التليفون بقى بيبعتلي على الواتس، ويقولي (استنى شوية بنحاول نحل المشكلة)، قولتله يعني إيه تحل المشكلة، أنا مضيت على الاستغناء وتنازلت عن مستحقاتي ونادي وادي دجلة، تعاقد مع مدافع افريقي مكاني فأصبحت بلا نادي قالي (انشاءالله هتتحل المشكلة)».
وأتم: «في يوم لاقيت سيد عبدالحفيظ، مبيردش عليا وحسام البدري، مبيردش والموضوع وقف، وكان متبقي 4 أيام على غلق القيد، الموضوع كان صدمة ليا، لأن الموضوع ده ميحصلش في النادي الأهلي، في الوقت ده دخلت في حالة نفسية صعبة جدًا ودخلت المستشفى لأن الضغط كان عالي عليا، عشان كدة مش مسامح حسام البدري وسيد عبدالحفيظ».