«ينفع ده يبقي مهاجم الزمالك؟».. إبراهيم سعيد ينتقد مهاجم الأبيض (فيديو)

انتقد إبراهيم سعيد، نجم النادي الأهلي ومنتخب مصر السابق، العديد من اللاعبين في مباراة الزمالك وبيراميدز التي جمعتهما مساء أمس الجمعة، على استاد القاهرة الدولي.
وتعادل الزمالك مع نظيره بيراميدز بهدف لكل فريق، في المباراة التي أقيمت بينهما باستاد القاهرة الدولي، في اللقاء المؤجل من الجولة الثامنة عشرة لمسابقة الدوري الممتاز، ليرفع الأبيض رصيده إلى 49 نقطة.
وقال إبراهيم سعيد في تصريحات تليفزيوينة عبر برنامجه «بلس 90» المذاع على قناة النهار: «مصطفى فتحي مع بيراميدز في مباراة الزمالك مش موجود، وده مستواه بشكل عام في المباريات المصيرية مش بيكون ليه دور، مش النهاردة بس وكمان في مباراة الأهلي السابقة مظهرش».
وأضاف نجم الأهلي السابق: «نادي الزمالك بيفكر في التعاقد مع مصطفى فتحي، طب النهاردة كل شيء عمله كان غلط من باصات أو تحركات أو حتى صناعة الفارق كأحد نجوم الفريق، كل ده محصلش فلازم يبقى في اختيارات صح فاللعيبة اللي المفروض تدعم الفريق».
وتابع: «شايف أن جوزيه جوميز كويس بس لازم تيجبوله القماشه اللي يشتغل بيها، وظهر النهارده بشكل منظم وتقدر تبني على الفريق ده، وتشوف مين اللي يصلح أنه يكون موجود الموسم الجاي».
وأكمل: «مع احترامي للجميع، بس هل ناصر منسي يصلح أن يكون مهاجم لفريق بحجم الزمالك، يقوده لانتصارات، لاعب مشتت وبياخد 30 قرار هشوط ولا أباصي ولا أعدي، وبياخد وقت كبير والكورة في رجله لحد متتقطع».
وزاد: «ناصر منسي مش مهاجم نادي الزمالك مش بياخد الكور العالية ولا بيلتحم ولا مهاري ولا عنده مرونة، لو بنتكلم على مهاجم الزمالك فتعالو نفتكر جمال عبد الحميد، أو حسام حسن، أو وليد صلاح عبداللطيف، عبدالحليم علي».
وأتم: «سيف الجزيري لاعب مميز جدًا وعنده مرونة وعنده كورة، فلازم الزمالك يختار اللعيبة اللي يبني عليها الموسم القادم ويرجع تاني زي الأول».