«لو جمهور الزمالك بيحبه يقوله كفاية».. هجوم ناري من إبراهيم سعيد على شيكابالا (فيديو)

علق إبراهيم سعيد، نجم النادي الأهلي ومنتخب مصر السابق، على عودة محمود عبدالرازق شيكابالا وظهوره في مباراة الزمالك أمام بيراميدز التي جمعتهما مساء أمس الجمعة، على استاد القاهرة الدولي.
وتعادل الزمالك مع نظيره بيراميدز بهدف لكل فريق، في المباراة التي أقيمت بينهما باستاد القاهرة الدولي، في اللقاء المؤجل من الجولة الثامنة عشرة لمسابقة الدوري الممتاز، ليرفع الأبيض رصيده إلى 49 نقطة.
وقال إبراهيم سعيد في تصريحات تليفزيوينة عبر برنامجه «بلس 90» المذاع على قناة النهار: «شيكابالا عاد للملاعب بعد غيابه 3 شهور تقريبًا، ولعب 8 دقائق واعتقد أنه وقت كافي لإظهار إمكاناتك والنهوض بالفريق من خلال خبراتك وهذا ما لم يحدث».
وأضاف نجم الأهلي السابق: «الناس اللي بتحب شيكابالا والقريبين منه، لازم تقولوله كفاية خلاص عامل السن والسرعة مش هيقدر يأدي في الملعب، فعلا الجمهور لو بيحبه، ده كلام كورة ودي سنة الحياة».
وزاد: «النهاردة أنا عندي 39 سنة أكيد مش بنفس مستوايا وأنا عندي 21 أو 22 سنة، وخاصة أن مركز شيكابالا محتاج سرعات ومهارة، غير عبدالسعيد اللي من نوعية اللعيبة اللي بتقف على الكورة عشان يلاعب الفرقة ويحرك اللعيبة وعنده الرؤية، وبيسدد».
وواصل: «محمود عبدالرازق بيباصي غلط وبيتحرك غلط، حتى المهارة بتاعته مظهرتش، والنجم لما بينزل لازم يصنع الفارق حتى لو 8 دقائق».
وأكمل: «مش هينفع تلعب عشان الاسم بس، لو على الاسم مكنتش بطلت بقى، ولا كابتن الخطيب أو حسن شحاتة أو متعب أو الحضري وغيرهم».
وأردف: «ممكن تاخد بقى منصب إداري في نادي الزمالك أو حتى في الجهاز المعاون للفريق، وفضي المكان للعيبة الشباب خليهم يظهروا زي أوشا مثلا لعيب كويس ويقدر يفيد الفريق في المستقبل، الماضي انتهى».
وأتم: «بكرر وبقول شيكابالا لازم يبطل عشان مش قادر يكمل ولا يدي في الملعب فالمقربين منه يقولوله كفاية عشان هيجي وقت زي حازم إمام الكبير نجم النجوم قالوله كفاية، ويتم الاعتماد على الشباب».