شوبير عن انتصارات بيراميدز: «مفيش فريق بطل بوجود معلمين»

أرجع الإعلامي أحمد شوبير حارس مرمى الأهلي ومنتخب مصر السابق انتصارات فريق بيراميدز المدوية هذا الموم وصراعه الشرس حتى الآن على لقب بطولة الدوري إلى تخلص الفريق من اللاعبين «المعلمين» في الفريق.
ورحل عن صفوف بيراميدز في الفترة الماضية من اللاعبين الكبار النجم عبدالله السعيد حيث انتقل لصفوف نادي الزمالك ومنذ رحيله وفريق بيراميدز يقدم أداء لافتا.
وقال أحمد شوبير في تصريحات إذاعية صباح اليوم الثلاثاء: «المدرب كرونسلاف يورتشيتش المدير الفني لفريق بيراميدز فرق جدا مع الفريق الشكل والروح والإصرار والعزيمة وهقول كلام هيزعل ناس كثير بتعجبني جدا مقولة المعلق أيمن الكاشف مفيش فريق بطل من غير حارس بطل، وأنا بقول مفيش فريق بطل في وجود معلمين».
للمزيد: شوبير: أي زملكاوي يتمنى فوز بيراميدز على الزمالك لكى يخسر الأهلي الدوري
وأوضح شوبير: «اللاعيب المعلم اللي هو بيقول الفريق ده بتاعي مينفعش ملعبش مينفعش أطلع من الملعب أو اتغير مينفعش أقعد على الدكة، فدي وجهة نظري، وحتى بقول كده على كريستيانو رونالدو قائد البرتغال اللي لعب 5 مباريات في بطولة أوروبا لم يسجل أي هدف، مينفعش يقول فرقة البرتغالي دي بتاعتي خاصة مع التقدم كمان في السن، ودي عموما سنة الحياة».
وتابع شوبير: «بيراميدز كان محظوظا بوجود طموح حقيقي لدّى الفريق والتعاقد مع مايلي هدّاف الدوري ولاعيب مميز جدا، كمان إبراهيم عادل ولد طموح بجد والفريق كله متعاون عشان يحققوا الانتصارات، وكل ده فرق مع نادي بيراميدز مع روح المدرب اللي بنشوفه ما بيبطلش صريخ على الخط وده شفناه حتى في مباراة سموحة اللي لعب فيها 40 دقيقة وسجل هدفين».
وأضاف شوبير: «وأنا بقول لكم بيراميدز سيظل لأخر مباراة ينافس على لقب الدوري ومكمل للاخر».