ميدو: «مفيش حاجة اسمها الأهلي نادي القرن»

رد أحمد حسام ميدو لاعب الزمالك ومنتخب مصر السابق، على سبه للاعبين أثناء التدريب قائلًا إن كل من دربهم يحبونه رغم إنه تعصب ويشتم.
وأضاف ميدو: «بيخافوا مني ساعات لأني ملتزم جدًا وبروح اول واحد وممنوع حد ينزل بعد ما أنا انزل، أنا مش كسول وبشتغل كتير وبصحى بدري وحققت كل أحلامي الحمدلله وهدفي اسفر من مصر 30 أو 40 واحد يلعبوا برة».
وتابع خلال لقائه ببرنامج «أسرار»، تقديم الإعلامية أميرة بدر، المذاع على قناة «النهار»: «مشاكل مرتضى منصور.. عمرو أديب موقفش جنبي ولكن ساعتها كان هو ومرتضى رافعين قواضي على بعض فموضوعنا جه في حتة واحدة وحلقتي مع عمرو أديب اعلى نسبة مشاهدة في تاريخ الوطن العربي وكنا مرتبين كل حاجة ومرتضى كان مقعد 40 محامي مستنينا نغلط فيه».
وواصل ميدو: «اتصالحت مع مرتضى مش اعتذرتله وولاده صحابي، أنا مكنتش ناوي أصالحه وبعرف اخد حقي الحمدلله، واللي حصل أن شيكابالا منه لله وراني الويل وبحبه جدًا، كان عمل غلطة كبيرة جدًا وكانوا هيمشوه من الزمالك، رحت واخد شيكابالا ورحتله المكتب رغم الخناقات اللي بينا وموديله بلطجية وكده ولكن ولا يهمني، وهو بيحبني جدًا، قالي أنت بتجبلي بلطجية قلتله امال أجبلك ملبس ما أنت كمان بتجيب بلطجية احنا بنحمي بعض بس، قلتله موضوع شيكابالا يخلص وخلصنا الكلام».
وأردف ميدو: «عمرو أديب موقعنيش في مرتضى لكنه زعل جدًا بعد ما اتصالحت مع مرتضى، وعمرو أديب ممكن يطلع أهلاوي وبيلعب بلقطة الزمالك عشان وأكلة في الميديا ده يعمل أي حاجة عشان ينجح برنامجه.. الزمالك نادي القرن ومفيش حاجة اسمها الأهلي هو نادي القرن مفيش الكلام ده».