محمد عدوية: محمد رمضان موهوب ومجتهد وأحضر لعمل مع والدي (فيديو)

تحدث الفنان محمد عدوية، عن ردود أفعال آخر أعماله الغنائية «قبطان سفينتي» وعن أعماله المقبلة، وقال عن ردود الأفعال: «الحمد لله الواحد بيجتهد ويعمل اللي عليه وبيعمل حاجة جديدة وفي الآخر بيستنى رد فعل الناس، والحمد لله في ردود فعل حلوة بس أنا مبحبش أتكلم على الكلام ده وأخلي الناس هي اللي تحكم».
وبسؤاله عن تعليق أحد المتابعين له أنه بعيد عن التريند، قال: «بحب دايمًا أعمل مختلف ومبيهمنيش اللي هو هيعمل ايه وبحب أعمل حاجة تعيش».
وأضاف خلال لقائه ببرنامج «فري تايم»، تقديم الإعلامية يارا أحمد، عن تحضيره أغنية جديدة مع والده الفنان أحمد عدوية: قائلا: «ده الأستاذ الكبير بتاعنا ده الأسطورة.. بنعمل حاجة بس لسه بنشوف الكلام بتاعها اللي هيليق وبنشوف اللحن لسه تحت ورشة عمل».
وعن أكثر شيء تعلمه من والده، أوضح قائلًا: إبقى نفسك وخليك نفسك أهم حاجة تبقى أنت ليك الهدف والحلم بتاعك اللي انت مقتنع بيه مش مهم هيعمل ايه ومش مهم هينجح بأي طريقة مش مهم هيوصل لغاية فين انت تصدق حلمك أهم حاجة، متابعًا: ده التارجيت بتاع الأستاذ طول عمره كان هو لما طلع في وسط السبعينات والستينات كان في العمالقة طبعًا الأستاذ عبدالحليم والسيدة أم كلثوم، طلع هو بلون مختلف وفضل وراه لغاية ما بقى أحمد عدوية.
وعن تجربته برفقة والده أحمد عدوية، ومحمد رمضان، قال: محمد ممثل موهوب جدًا ومجتهد بصراحة، وربنا يوفقه، وطبعًا كانت حاجة حلوة جدًا وكانت خطوة جميلة إن إحنا التلاتة نجتمع في عمل واحد، لأن من حسن حظي اني أبقى مع أبويا الأسطورة بتاع الغناء الشعبي ومعايا محمد رمضان طبعًا رمضان ربنا يحفظه بني آدم مجتهد جدًا فكانت حلوة طبعًا وربنا وفقنا فيها.
وعن أعماله المقبلة: «بحضر لأغنية تانية بس نخلي دي تاخد وقتها شوية أنا بحب أدي كل حاجة حقها في السمع مش مستعجل على إنها تتسمع بسرعة أهم حاجة تاخد وقتها في سمعها».