مدير أعمال تامر حسني ينجو من حادث سير: «حصلي نزيف وخدت 8 غُرز» (صور)

كشف تامر يحيى مدير أعمال الفنان تامر حسني، أنه تعرض لحادث سير، أثناء هعودته من العلمين صباح اليوم، مشيرًا أنه نجى من الحادث بإعجوبة.
ونشر «يحيى» صور وفيديوهات تكشف تحطم سيارته بعد الحادث وكتب عبر حسابه بموقع «فيس بوك»، وعلق عليهم قائلًا: «مافيش كلام ينفع يتقال غير الحمد لله وبشكرك يا رب على كل حال وفي كل حال ومن أجل كل حال وعلى كل تجربة صعبة أنت بتحطني فيها علشان تفكرني دائما بوجودك في حياتي، وبتكون رسالة سواء أنت بتحبني وبتفديني من حاجة أكبر كان ممكن تحصل ليا أو لحد غالي عندي أو بتكون عايز تفكرني أنا فيه خطأ في حياتي محتاج انتبه ليه وأصلحه والحمد لله أنا عندي ايمان شديد بتجارب ربنا ونعمه الكبيرة في حياتي».
وأضاف مدير أعمال تامر حسني كاشفا تفاصيل الحادث: «أنا ومحمد السواق الجميل اللي معايا ربنا نجانا من الموت امبارح في حادثة من أكبر الحوادث اللي عملتها في حياتي وإحنا راجعين من العلمين الساعة 1.30 ظهرا فجأة ظهرت عربية نقل قدامه واقفة في نص طريق وادي النطرون في الحارة الثالثة وهو كان قبلها بثواني بيحاول يشغل حاجة في الشاشة اللي قدامه فمكانش في كامل تركيزه على الطريق وما قدرش يتفاداها».
وتابع: «العربية هربت من موقع الحادث بسرعة علشان عارف طبعا إنه غلطان وأنا ومحمد ما قدرناش ننزل من العربية غير بعد تقريبا ربع ساعة علشان الدم كان مغرق العربية والمشكلة اللي عقلي مش قادر يستوعبها إنه إزاي مافيش ولا air bag فتحت؟ أنا مش هقدر أعدي الموضوع ده من غير ما ألاقي إجابة فنية ليه لأني لو عرفت إنه ده خطأ فني في اللي برمج السوفت وير أو ركب السينسورز أنا مش هسيبه إلا لما أسجنه لانه كان حياتي هتنتهي أو أعيش بتشوهات في وشي طول عمري بسبب عدم فتح أي air bag».
واستكمل مدير أعمال تامر حسني: «أنا حصل لي نزيف جامد بسبب كسر في مناخيري وقطع أخذ 8 غرز وقطع داخل الفم اخذ 3 غرز وشرخ في الساق وغالبا هعمل عملية في مناخيري بعد 5 أيام، محمد السائق الحمد لله كان حاطط حزام الأمان فربنا انقذه وكل اللي فيه مجموعه كدمات، والنقل هرب من موقع الحادث وأنا طلبت النجدة الإسعاف 17 مرة لكن للأسف كل مرة يردوا طالبين مني تحديد موقعي أو أي علامة مميزة في الصحراء وفي طريق صحراوي ودي يعني خليتني اتعصب عليهم لكن مافيش أي حاجه نفعت معاهم».
وأختتم مدير أعمال تامر حسني: «الحمد لله على كل شئ ويارب ما يوري حد منكم أو حد غالي عليكم اللي انا شوفته النهارده.، شكرا لكل اصحابي اللي وقفوا معايا وساعدوني واهتموا انهم ينقلوني افضل مستشفيات علشان اخد احسن رعايه وغرز تجميل واتطمن على نفسي.، شكرا هاني هانز وضياء سليمان ودكتور محمود السيد ودكتور احمد نجم وكل تيم مستشفي الرفيدة على كل حاجة، شكرا اخواتي تامر حسني وحسام حسني ورومير على الاهتمام ومتابعه حالتي طول اليوم، وشكرا عماد نبيل بجد انت اخ حقيقي على كل اللي عملته معايا النهارده وخلي بالك من العربيه بقي لحد ما تروح لحال سبيلها أو نبيعها خرده علشان انا مش هركبها تاني وربنا يعوض عليا ويبعد عننا كلنا العين الشريرة، تاني أنا كويس الحمد لله بس معلش تليفوني قافله كام يوم محتاج فيهم راحة وهدوء».