«كلهم عاملين تاتوه ولاعبين في وشهم»..عارفة عبدالرسول عن مسلسل «بالطو»: «المخرج داخ عشان يلاقي بنت تشبه الريف»

قالت الفنانة عارفة عبدالرسول أحد أبطال مسلسل «بالطو» إن نجاح المسلسل جاء بسبب أنه شبهنا، مشيرة إلى أن المخرج عمر المهندس كان لديه حيرة كبيرة في بطلة العمل بسبب عدم وجود بنت طبيعية متوسطة تشبه الريف.
وأضافت «عارفة» عبر صفحتها ب«فيس بوك»: «ليه مسلسل (بالطو) نجح النجاح المدوى ده، لانه شبهنا بتاعنا، مافيش حد ماشافش حته منه أو حد شبهه في طرشوخ الليف تقول لنفسك فجأة، أه والله كان بيحصل كده، أحنا كممثلين ماكناش احنا بس كنا احنا، وفى كلمه قالهالى المخرج عمر المهندس على جنب كده، لما كان بيعمل الكاستينج للمسلسل داخ عشان يلاقى بنت شبهنا من طبقه متوسطه ومن مدينه في الريف تبقى دكتوره في وحده صحيه في أرياف برضه».
وتابعت: «كل البنات لاعبه في شكلها وتاتو وشفايف وحواجب، كلهم دكتور تجميل واحد عامل قالب واحد، وقع الاختيار على مريم الجندى، مش عشان هي بنت محمود الجندى ولا اخت أحمد الجندى، ولا عشان هي ممثله كويسه، رغم أنها ممثله ممتازة، ولا عشان كانت في ورشه استاذنا خالد جلال ولفت لفه حلوه ع المسرح اتكحرتت يعنى، كل ده مكانش سبب لترشيحها للدور، السبب كان شكلها العادى، بنتنا، مننا، صرخه مكتومه من قلبى للبنات، ارجوكم، حبى شكلك اللى ربنا وهبه لك، مناخيرك كبيره شويه وماله دى ميزه، سنانك معووجه مايضرش دى ميزه أرجوكم كونوا عاديين».