ضربتين في صدره.. مقتل بائع متجول في أبوالنمرس على يد جاره بسبب «لعب العيال» (صور وفيديو)

الحزن يلف منزل «مسعد»، البائع المتجول، الذي ضربه جاره «حسام» لكمتين في صدره على أثرهما «مسك قلبه، وصرخ، وروحه فاضت إلى بارئها»، وفق أسرته التي تطلق عليه «شهيد الشهامة»، لدفاعه عن طفل كان المتهم يصفعه على مرأى ومسمع من أهالى أبوالنمرس في الجيزة.
قتل بائع متجول على يد جاره في أبوالنمرس
«مسعد»، ملامحه بالصور تدل على الشقاء والكدح، كان يغيب عن أسرته بالشهرين في أسوان، حيث يبيع أدوات ومستلزمات منزلية، وما إن وصل إلى منزله ليرتاح بين عائلته حتى سمع صوت صغيره «جمعة» يصرخ بمدخل العقار والدم يسيل من رأسه، وحين سأله «مالك يا ابنى.. مين ضربك؟»، كان الطفل يسبقه إلى الشارع مصممًا على أخذ حقه من ابن الجيران، وهو يقول لأبيه: «ضربنى في دماغى بطوبة».
الأب جرى وراء ابنه ليستوقفه جاره «حسام» محاولًا التعدى على نجله، فعاتبه: «مش كفاية ابنك ضارب الولد وفاتح نافوخه، كمان انت عاوز تضرب ابنى وبتشتمه، دول عيال صغيرة مع بعض».
الأم تحاول أن تٌقصر الشر
وحضرت زوجته، وقالت له وهى تسحبه من يده: «خلاص يا (أبوشهد)، إحنا هنروح وهات (جمعة)، ومش هيلعب تانى في الشارع، اطلع على البيت استريح من التعب»، في الوقت ذاته الجار كان يصفع طفلًا آخر يُدعى «محمد»، والجيران، وفق قولها: «كانوا عمالين يتفرجوا، وماحدش عاوز يتدخل، زوجى اقترب من جارنا ومسك إيده وحاش عن الولد، وقال له: ده زى ابنك».
تدخل «مسعد» جعل جاره يستشيط غضبًا، ويدفعه في صدره بلكمتين، زوجة المجنى عليه تحاكى المشهد: «مسك قلبه، وقال: آه.. آه، وبعدين سند ضهره على الحيط، ويادوب مسك تليفونه اتصل بأخوه (عاشور)، قالّه: تعالى لى أنا بتخانق، والجيران سندوه لحد باب بيتنا، وأنا اخدت ابنى (جمعة) على البيت، وفجأة جوزى سقط على الأرض، وقطَع النفَس».
إحنا الاتنين لسة راجعين من السفر
«عاشور»، شقيق المجنى عليه، دُهش لاتصال ابنة أخيه «شهد» به مرة ثانيةً، بينما يقول لها: «خلاص أنا داخل على البيت عندكم»، وفوجئ بها تلقى بالفاجعة في وجهه: «أبويا الناس شالته على المستشفى، وبيقولوا: ده شكله مات من الضربتين اللى في صدره»، وأمام تروللى يحمل جسد «مسعد»، وقف أخوه يناجيه ويصرخ: «إصحى فوق لى مالك»، وهو يمسك بتذكرتى قطار أسوان، ويشير للأطباء، وهم يؤكدون الوفاة: «إحنا الاتنين لسة راجعين من السفر، أخويا جاى إجازته يقضيها مع عياله، وربنا كان رازقه، وفرحنا بشرائه جهاز لابنته»، مندهشًا من حكى الأهالى عن سيناريو مقتله: «معقول ضربتين في صدره يموتوه، ده عمره ما كان بيعانى من أي مرض!».
على جدران الشقة، صور تجمع «مسعد» وأفراد أسرته، حيث تقف زوجته أمامها تقول: «كان بيعاملنا بما يرضى الله، عمره ما شغلنى، وكان مكفِّى بيته، مات وساب في رقبتى 5 عيال، هعمل فيهم إيه واصرف عليهم إزاى؟!»، لتتدخل شقيقته بحديثها وتحتضنها: «أخويا راح غدر، والجانى حرمنا منه، لازم هو كمان يتحرم من عياله، بنطالب بأقصى عقوبة عليه بالقانون».
الطفل «جمعة»، ابن المجنى عليه، لم يخرج من بيته، واعتزل أصدقاءه: «أبويا مات، وابن (حسام) على طول كان بيضربنى، ووالده ضرب صاحبنا على وشه لأنه افتكره بيقوِّم العيال على بعض، وأبويا تدخل لإنقاذه».
أهل المتهم يغادرون المنطقة
والدة الطفل «محمد»، من شهود العيان، تقول: «جارنا (مسعد)، شهامته خلته يدافع عن ابنى في الوقت نفسه كل الأهالى كانوا بيتفرجوا على اللى بيحصل أدامهم، والجانى كل الناس بتشهد أنه بتاع مشاكل».
أهل المتهم غادروا بيتهم بعد الجريمة، إذ ضبطته أجهزة الأمن على الفور، بعد تلقيها إشارة من مستشفى أبوالنمرس العام، بوصول بائع متوفى، ووجود شبهة جنائية، وأمرت النيابة العامة بحبسه 4 أيام على ذمة التحقيقات، بعد اعترافه بأنه «ضربته في صدره علشان أبعده عنى واكمل ضرب في الولد، مكانش قصدى اقتله».