في «شيزلونج».. ريهام عبدالغفور: أنا بنت أبويا وأهم قيمة تعلمتها منه الرحمة (فيديو)

حلت النجمة ريهام عبدالغفور ضيفة على برنامج «شيزلونج»، الذي يبث عبر قناة «المصرى اليوم»، على «يوتيوب»، وتحدثت خلاله عن مراحل حياتها قائلة: «كنت طفلة سهلة الكسر وخجولة وممكن أقعد بالساعات لوحدى، وابنى قالى جملة مش ناسياها: (إنتى بتسيبى الناس تدوس عليكى بالكسوف اللى عندك)». وبسؤالها: «هل فكرتِ في تغيير شخصيتك؟» أجابت: «بغيرها طول ما أنا ماشية في الحياة، وفى نفس الوقت بحس بالرضا عن اللى وصلت له، وكل ده بسبب التجارب العديدة اللى مريت بيها».
وتابعت: «أنا شخصية متوترة طول الوقت، والإحساس بيزعجنى، لكن مش قادرة أتخلص منه، وبأتمنى أقلل التوتر، وأكثر شىء بيخوفنى الفشل والإحباط وفكرة الخوف نفسها، سواء من المرض أو فقد إنسان عزيز عليا».
وحول ذهابها لطبيب نفسى بسبب عمل أدته قالت: «دورى في مسلسل (الرحلة).. رحت لدكتور علشان أعرف ملامح ومشاعر اللى بياخد مهدئات ومحبوس لمدة 6 سنين، والغريب إنى رحت له تانى بعد تصوير المسلسل بسبب التعب النفسى اللى سببه لى الدور».
وفيما يلي نص الحوار:
* هل الغفران فى اسمك فقط أم فى سلوكك وتصرفاتك أيضًا؟
- فى سلوكى طول الوقت.. عندى تسامح مع الآخرين.
* ما أكثر اسم تكرهين أن يناديك به أحد؟
- ريرى بكرهه جدًّا؛ لأنه مش لايق عليا ولا على شخصيتى.. واسم الدلع اللى كل أصحابى بينادونى به «ريكو».
* هل من الممكن أن يستغل أحد طيبتك ضدك؟
- بيحصل كتير، لكن مش لدرجة إن حد يضحك عليا بسهولة.
* كماذا يبقى بداخلك من الطفولة؟
- كنت طفلة سهلة الكسر وخجولة جدًّا وممكن أقعد بالساعات لوحدى، ولما كبر ابنى قالى جملة مش ناسياها: «إنتى بتسيبى الناس تدوس عليكى بالكسوف اللى عندك.. وعلى فكرة لغاية دلوقتى سهل جدًّا حد يجرح مشاعرى».
* ما أهم قيمة علمها لك والدك الفنان أشرف عبدالغفور؟
- أنا بنت أبويا، ومتعلقة به بشكل فظيع وأهم قيمة اتعلمتها منه تتلخص فى الرحمة «والكاظمين الغيظ والعافين عن الناس».
* كيف تقيّمين نفسك كأم؟
- ما أحبش أشكر فى نفسى، لكن نقول 9 من 10 وأنا سعيدة بتجربتى كأم لأن الفرق صغير جدًّا بينى وبين ابنى الكبير يوسف اللى أنجبته وعمرى 21 سنة، وعلشان كده احنا أصحاب أوى وفى بينّا لغة حوار ومش بس كده.. بأعتبره طبيبى النفسى لما تكون عندى مشكلة.
* ما المخبأ العاطفى الذى تهربين منه حين تواجهك مشاكل؟
- بيت واحدة صاحبتى اسمها «بوسى»، أقرب صديقة ليا.
* هل تستطيعين أن تأخدى حقك حين تحسين بالظلم؟
- لو اخترت أخده حاخده، لكن أحيانًا كتير باطنش لإنى معنديش طاقة للمشاكل وعلشان كده ممكن تلاقى ليا حقوق كتير ضاعت منى.
* متى يتحول الوجه الملائكى لإعصار غضب؟
- لما حد يخذلنى، وبأكون حطيته فى مكانه وطلع مش قدها على مستوى المسؤولية.
* هل الصبر عندك له حدود؟
- أكيد فأنا صبورة جدًّا وعاملة زى «الجمل»، لكن لو نفد صبرى بأبقى بنى آدمة تانية خالص.
* ما أكتر كلمة تقولينها وأنت عصبية؟
- أستغفر الله العظيم.
* بما أنك تحبين المطبخ.. ما المقادير التى تتكون منها شخصيتك؟
- شوية صبر على حبة توتر وعصبية مع كثير من التسامح وروقان البال، وعلى فكرة أنا بحب المطبخ لإنى باحب أعزم الناس اللى باحبهم وأعمل لهم أحلى أكل.
* هل فكرت فى تغيير شخصيتك؟
- بأغيرها طول ما أنا ماشية فى الحياة.. بأغير اللى مش عاجبنى، وفى نفس الوقت بأحس بالرضا عن اللى وصلت له النهارده.. وكل ده بسبب التجارب العديدة اللى مريت بيها.
* هل تستطيعين أن تنقدى نفسك؟
- طول الوقت بأنقدها وبأشوف نقط الضعف علشان أقويها، ولعلمك أنا شخصية متوترة طول الوقت، والإحساس ده بيزعجنى جدًّا لكن مش قادرة أتخلص منه، وبأتمنى أقلل التوتر لإنى بأوتر كل اللى حواليا.
* ما أكثر شىء تخافين منه؟
- الفشل والإحباط وفكرة الخوف نفسها سواء من المرض أو فقد إنسان عزيز عليا.
* هل ذهبت لطبيب نفسى بسبب عمل أديته؟
- آه.. دورى فى مسلسل «الرحلة».. رحت لدكتور علشان أعرف ملامح ومشاعر اللى بياخد مهدئات ومحبوس لمدة 6 سنين، بيكون إحساسه إيه، والغريب إنى رحت له تانى بعد تصوير المسلسل بسبب التعب النفسى اللى سببه لى الدور.
* هل هناك شخصية تحبين تمثليها؟
- شخصية مدمنة؛ لأن عالم الإدمان لم أتطرق له، وتعاملت مع ناس كتير تعرضوا للحالة دى واكتشفت أنه عالم غريب جدًّا.
* ما أكبر غلطة ارتكبتها فى حياتك؟
- غلطاتى معظمها بتكون بسبب اختيارت خاطئة، وأبرزها بيكون فى الشغل وخصوصًا فى بداياتى.. كنت باختار غلط.
* ما أكثر شىء يثيرك؟
- بجاحة الناس وتطاولهم بدون حق.
- ما أهم كلمة حب فى قاموسك؟
- أنا حبيبة أوى وتقدر تقول «باحب على روحى» وأنا مؤمنة إن الحب موجود، ولم يختف رغم أن كل المظاهر اللى حوالينا بتقول إنه ضاع ومالوش مكان فى حياتنا.
* هل الناس جيدون فى نظرك إلى أن يثبت العكس أم العكس؟
- لا كلهم كويسين جدًّا لغاية ما أشوف الصدمة بعينى أو أسمعها بودنى.
* ما الشىء الذى يحيرك فى شخصيتك؟
- كل ما أدخل شغل أقول لنفسى: «مش هاعرف أمثل حلو»، نفسى أحس إنى مطمنة وواثقة فى أدائى.
* لو أقمت علاقة إنسانية ولم تستمر.. ماذا تصنعين؟
- حسب الشخص.. ممكن أبيعها وأنساها خالص وممكن أحطها فى صندوق الذكريات
* ما لونك المفضل؟
- الأبيض.
* كيف نشترى راحة البال؟
- بالرضا والتسليم والقبول ونبطل نسأل «إيه اللى حيحصل»؟
* هل تشترين أشياء غير مهمة بالنسبة لك؟
- أنا مش من الستات المهووسة بالشراء.
* لو أنك تستغنين عن أحد.. من يكون؟
- الناس المضرة فى حياتى.
* هل هناك أناس اشتريتهم وباعوك؟
- كتير جدًّا بس فى النهاية همّا الخسرانين.
* قد تكونين من قلائل النجمات اللاتى ينشرن صورهن بدون فلتر!
- بأحب تجاعيدى..وعاجبانى نفسى كده.
* هل هناك مهنة غريبة كنت تحبين أن تعملى بها؟
- آه.. بياعة ورد.
* ومين سيكون أول زبون؟
- أبويا.
* ما شكل علاقتك بالسوشيال ميديا؟
- ضعيفة جدًّا ومش غاوياها ومش باعمل فيها أى مجهود ومش مهتمة إن كل أخبارى تتنشر عليها، ويمكن مش هتصدقنى لو قلت لك إن أى فوتو سيشن بأعمله بيكون عبء عليا.
* هل أنت عنيدة؟
- آه.
* ومتسرعة؟
- لا.
* هل تكونين عدوانية؟
- لا.
* هل تشعرين أنك مثالية؟
- أنا مش مثالية خالص وعندى أخطاء وعيوب كتيرة.
* أين تجدين السعادة؟
- مع عيلتى وجوزى وأولادى وإنى أعيش كل تفاصيل حياتهم.
* هل تُعرِّفين نفسك فى كلمتين؟
- مش بطّالة