«نجاحنا كشف فشل أندية معرفوش يكسبوا بطولة».. عبدالظاهر السقا يفتح النار على فتح الله

فتح عبدالظاهر السقا، المدير الرياضي لنادي فيوتشر، النار على محمود فتح الله، المدرب العام للفريق الأول لكرة القدم بنادي بيراميدز، وذلك بعد تصريحاته عقب مباراة الفريقين في بطولة الدوري، والذي انتقد تعيين محمد معروف، حكمًا لمباراة الفريقين للمرة الثالثة على التوالي.
وقال عبدالظاهر، في تصريحات تليفزيونية عبر فضائية «إم بي سي مصر»: «انا عاوز واحد مسؤول من بيراميدر عشان أكلمه، أنت مش مسؤول عشان تتكلم أنت مساعد مدرب مع كل المدربين الذين تولوا تدريب بيراميدز خلال السنوات الماضية، وأنا مش عارف ليه!».
وأضاف: «محمود فتح الله، اعترض على تعيين محمد معروف، حكمًا لمباراة فيوتشر وبيراميدز للمرة الثالثة على التوالي، ما محمد الحنفي حكم لفيوتشر الموسم الماضي 4 مباريات أهلي وزمالك في الدور الأول وأهلي وزمالك في الدور الثاني، ولم نتعرض، هذا الموسم 3 لاعبين تعرضوا للطرد وتم احتساب علينا أكثر من ضربة جزاء وعمرنا ما اعترضنا».
وتابع: «في مباراة الأهلي مطرود منا لاعب واحتسبت علينا ضربة جزاء، ولم نعترض، وهو مغلوب من الأهلي 4 أنا مش عاوز أرجع للماضي، هو ده الفرق، إدارة فيوتشر عارفة طريقها ولا تنظر للصغائر بتشتغل بس وناجحة، كشفت ناس كتير الفترة اللي فاتت فالكلام ده بيزعل ناس كتير.. في ناس صعبان عليها إن فيوتشر نجح».
وأكمل: «لما تطلع تتكلم في كل البرامج، انت كده موجه، عيب، هو مش عشان نادي ناجح يبقى كل الناس تخبط فيه، احنا لينا لسان وكباتن مصر ولينا سلطة، ولكن احنا بنحترم نفسنا وبنشتغل بس.. احنا لما بنكسب بنكشف ناس كتير مش عارفة تعمل زينا، هو ده الفرق كل الناس صعبان عليها اننا ناجحين».
وأردف: «احنا عمرنا ما علقنا فشلنا على حد تاني، احنا لما بنفشل بنقول احنا فشلنا، احنا دايمًا ساكتين وبنشتغل بس، للأسف نجاحنا بيكشف ناس، وكل الناس عارفة مين فيوتشر ومين الأندية التانية، ومين بيشتغل ومين مبيشتغلش ومين عنده إدارة جامدة ومين معندوش إدارة جامدة».
واختتم عبدالظاهر، تصريحاته، قائلًا: «احنا ناس محترمة بتشتغل بس، وأول سنة نجحنا في التتويج ببطولة كأس الرابطة، نجاحك بالفوز ببطولة في أول سنة، كشف أندية تانية مش عارفة تكسب بطولة».