قدم الدكتور جمال شعبان، عميد معهد القلب الأسبق، شرحا حول أسباب زيادة الأزمات القلبية، وكيفية اكتشافها، ومساعدة الشخص المصاب بأزمة قلبية. وقال الدكتور جمال شعبان، عبر صفحته الرسمية على موقع التواصل الاجتماعي «فيس بوك» اليوم الأربعاء،: «سؤال بييجي لي كتير، ليه الأزمات القلبية زادت؟، وازاي أعرفها؟، وازاي أساعد اللي عنده ازمة قلبية؟». وأوضح شعبان، أن الأزمات القلبية زادت لأسباب كتير، منها التوترات والضغوط، وارتفاع ضغط الدم في سن صغير (26٪ من المصرين البالغين ضغطهم مرتفع)، وارتفاع نسبة المصابين بمرض السكر، وعدم ممارسة الرياضة ولا المشي (مما أدي إلي ترهل الجسم)، إضافة إلى ارتفاع نسبة الكولسترول الضار، ونوعية الأكل غير الصحي، والسمن الصناعي والمشروبات الغازية، والتدخين والمسكنات بكثرة والمخدرات، والمكملات الهورمونية دون اشراف طبي، وأخيرا، التاريخ العائلي الوراثي له دور كبير علشان في عائلات عندها استعداد لأمراض تصلب الشرايين وأزمات القلب. وحول كيفية اكتشاف الأزمات القلبية، أكد عميد المعهد الأسبق: «مش لازم استني لما قلبي يتعب، لازم الاكتشاف المبكر، اكتشاف الضغط بالقياس، والسكر والكولسترول بالتحليل وضبطهم بالعلاج، والشعور بأي وجع في منطقة الصدر مش متعود عليه بيزيد مع المجهود سواء كان الوجع علي شكل حموضة أو حرقان او سكاكين بتقطع، ممكن علي شكل نهجان ورفرفة في القلب وعرق. وعن كيفية اسعاف المريض، أوضح، «4 أقراص أسبرين أطفال أو 4 أقراص مضاد للصفائح بلافيكس، ولصقة نيترودرم على الصدر، واستدعاء الإسعاف في حالة عدم سكون الوجع. وتابع: «لازم نتعلم ازاي نعمل تدليك للقلب علشان نسعف الشخص اللي عنده أزمة لو توقف قلبه، ولازم تهدوا اعصابكم الدنيا منفاتة، و #ما_تزعلوش».
