بالأمارة لما الشاي اتكب على ظهري وكنتي بتغني «يا ليلة ما جاني الغالي».. رضا تعود لأمها بعد فراق 45 عاما (فيديو)

فرحة وزغاريد ممزوجة بالدموع وسجود لله شكرا، انتابت أسرتين من بني سويف والأقصر، عاشتها «المصرى اليوم» في نجع الطويل بمنطقة الكرنك شرق الأقصر، عندما التقت تحية عويس 70 عاما بائعة خضروات من مدينة الفشن، بمحافظة بنى سويف، بنجلتها رضا عبدالرحيم المقيمة في الأقصر، بعد غياب دام 45 عاما، وظلت أسرة تحية تبحث عن نجلتها طوال هذه السنوات إلى أن ظهرت رضا «في بث مباشر» على صفحات التواصل الاجتماعي تحكي قصتها، وأنها تاهت من والدها ووالدتها عام 1979 عندما كان عمرها 7 سنوات، وشاهدتها والدتها في البث المباشر لتقول هذه بنتي رضا .
على وجه السرعة ووسط أفراح وزغاريد وبكاء الأم ونجلتها قامت أسرة تحية من بنى سويف بالذهاب إلى نجع الطويل بالأقصر للقاء ابنتهم «التائهة» من 45 سنة، قالت رضا عبدالرحيم، وهي تبكي مرة وتضحك مرة، وهى تعانق والدتها «تحية»، أنا مش مصدقة انني شفتك تاني يا أمي، ويعلم ربنا أنا كنت عارفة إنى هشوفك تاني، وتضيف «رضا» في عام 1979 كنت موجودة من أمي وأبوي في منطقة السككرية بمدينة الفشن ببني سويف، بجوار المحطة، وركبت القطار ونزلت مركز ملوى بمحافظة المنيا، وعشت فترة مع أسرة استقبلتني وبعدها ركبت القطار تاني ونزلت على الأقصر واستقبلني عم محمد العبد، وعاملني زي بنته وسكنت مع أسرته وأخوه رئيس قطار، وجوزوني من عم جمال، وكان ضرير وعشت معه أيام حلوه وانجبت 4 أولاد وتوفي ابني محمد في حادث، والله كان نفسى جوزي يبقى عايش النهاردة .
وقالت أنا قبل ما أعمل البث المباشر على الفيس بوك، نمت وقمت وجدت فراشة في صالون المنزل بتلف في المنزل كله، والفراشة عندنا دليل بهجة، وبعدها جاء تليفون من بني سويف على محمولى بيقولوا لى انتى رضا بنتنا، مكنتش مصدقة نفسى انا واولادى .
أنا بشكر أهل نجع الطويل اللي وقفوا معاي وأنا «تائهة»، عاملوني على إني بنتهم وعطفوا على وساعدوني ومازالوا بيساعدوني بعد ما جوزي توفي .
وتابعت رضا ل «المصري اليوم»، وأنا عمري 7 سنوات لما ركبت القطار ونزلت في ملوى الناس كانت بتسالني انتى منين كنت بقول من بني سويف، لكن معرفتش أقول أنا من الفشن واسم المنطقة وعشان كده عمرى راح بين ملوي والأقصر، والحمدلله ربنا رزقني بناس طيبين والحمد لله معملتش غلط في حياتى، وأول ما أمى كلمتنى في التليفون حكيت لها قصة «واقعة الشاي» لما اتكب على ظهري «ولقيت أمى صرخت في التليفون قالت لي انتي بنتي رضا والله.
وتقول تحية عويس، والدة رضا أنا فرحانة قوى النهاردة أني رجعت بنتي لحضني تانى، وأول ما شفت البث المباشر من أسبوع على الفيس بوك، وابني اللي جاب الفيديو بالليل الساعة واحدة بالليل وكنت في المنزل قال يا أمى شوفي الفيديو ده سمعت صوت رضا وكانت بتتكلم إنها خرجت من بنى سويف وركبت قطار وتاهت 45 سنة عن أسرتها فقلت لإبني كلمها في التليفون لإن أنا حاسه إنها «رضا» ولما كلمتها قالت لى على «أمارة» واقعة سكب الشاى على ظهرها، صرخت في التليفون وقلت لها انتي رضا بنتي .
وتروى تحية عويس والدة رضا، إن يوم غياب رضا كنت أنا وأبوها في السوق وهيه معانا والسوق بجوار محطة القطار وكانت بتلعب، وركبت القطار وغابت عنا 45 سنة، وبحثنا عنها في كل مكان لمدة 5 سنوات ولم نعثر عليها .
وقالت رضا بنتى كنا بنروح السوق نبيع خضروات وكان صوتها جميل وكانت بتغني وتقول «يا ليلة ما جاني الغالي ودق عليّا الباب،» وكان عمرها 7 سنوات، وكنت أقولها عيب يا رضا، وكان فيه جزار موجود في السوق بجوارنا وأنا ببيع يقولي سيبي رضا تغني صوتها حلو .
وتابعت والله أنا عمرى ما نسيت بنتي أبدا، وكانت دائما تيجي لي في الحلم وتقول لي أنا عايشة يا أمي، وكنت بدعي ربنا كل يوم، إن رضا ترجع، وفي لحظة فقدت الأمل لكن ربنا استجاب لدعائي قبل ما أموت وأشوف بنتيي، وتقول أن رضا سالتنى عن ابوها وكان يعمل صياد سمك قلت لها مات، لكن اخواتك البنات الإثنين موجودين وال 3 صبيان اخواتك الرجالة عايشين.