«فيتوريا لئيم وناصح».. شوبير عن اختيارات عناصر منتخب مصر

يستعد منتخب مصر الأول لكرة القدم لخوض معسكره الإعدادي الأول تحت قيادة مديره الفني الجديد روي فيتوريا، حيث ينطلق المعسكر في 13 من شهر سبتمبر الجاري وينتهي يوم 27 من الشهر نفسه.
وعلق الإعلامي أحمد شوبير حارس مرمى الأهلي ومنتخب مصر السابق على اختيارات البرتغالي فيتوريا لعناصر منتخب مصر قائلًا: «البضاعة الجيدة بتفرض نفسها وممكن تلاقي لاعيب 22 سنة مش قادر يجري ولاعيب 33 سنة مكسر الدنيا وعندنا كريم بنزيما وليفاندوفسكي وفي مصر عبدالله السعيد وغيرهم كثير».
وتابع أحمد شوبير في تصريحات إعلامية صباح اليوم الاثنين: «أنا بقول الكلام ده ليه عشان عايز أحيي النجم طارق حامد ده راجل حصله مشاكل كثيرة مشي من نادي الزمالك وعقده خلص والنادي مش عايز يجدد له والنادي مشي كويس من غيره وخد الدوري وخد الكاس، وبرضه طارق حامد توكل على الله ولعب أساسي مع فريقه اتحاد جده لكن الأهم بالنسبة لي عودة طارق حامد لصفوف منتخب مصر بعد 328 يومًا».
وأوضح أحمد شوبير: «طارق حامد لما لعب مع اتحاد جدة كسبوا ماتش واتعادلوا ماتش وفيتوريا شافه وخدها مني فيتوريا راجل زكي وناصح ولئيم واللؤم هنا مطلوب، عشان هو هيلاعب القائمة كلها اللي معاه وهيشوف كل العناصر، يعني لما المنتخب دلوقتي فيه أسامة جلال وفيه كريم فؤاد وده أمر أسعدني لأنه كان من أهم لاعبي الأهلي في الفترة اللي فاتت الحقيقة ولعب في كل المراكز تقريباً».
وأضاف شوبير: «وحتى من المحترفين جاب سام مرسي، بس أنا سعيد جدا لطارق حامد وفيه تواصل دائم بيني وبينه وبحبه على المستوى الشخصي ورغم قوته دي في الملعب هو خارج الملعب شخص هادئ وجيد ومحترم جدا».