«شربنا من نفس الكأس».. عمرو أديب يعلق على خسارة مصر لقب أفريقيا أمام السنغال

علق الإعلامي عمرو أديب على خسارة منتخب مصر نهائي بطولة الأمم الأفريقية عقب الهزيمة أمام السنغال بركلات الترجيح.
وقال أديب خلال برنامج «الحكاية» المذاع على قناة «أم بي سي مصر»: «الولاد عملوا اللي عليهم وأكتر أسأل أي مصري يقولك إننا لعبنا مباراة قوية وأن الفرقة دي لعبت أصعب ماتشات في البطولة ومحدش قابل أقوى الفرق ورغم ذلك في النهاية أبطال دول محترمين يستاهلوا المساندة».
وأضاف: «عايز أقولهم لسة الأماني ممكنة كاس العالم يا ولاد أنا بالنسبالي أداء المنتخب كافي؛ لما تسألني كأس الأمم الأفريقية والا الوصول لكأس العالم أقولك الوصول لكأس العالم».
وتابع: «الرجالة عملوا مباراة عمرهم محدش قصّر، اللاعيبة مجهدة واجتهدت حتى النهاية، وفي النهاية الجنرال حظ والنصيب وشربنا من نفس الكأس، محمد عبدالمنعم الراجل حاطط الكورة في الجول وتأتي العارضة وتقول لا ولاشين اللي دايما بيحط قالوا مش النهاردة».
وأوضح: «كل الفريق كوم وبعد التحية للفريق اعمل تمثال لأبوجبل وحطة فوق الهرم الراجل لولاه كان ممكن مصر تخسر من الأول وصده لضربة الجزاء من الأول».
وأكمل: «كان ممكن العارضة تتحرك يمين أو شمال إنما بنشكر منتخب مصر محدش كان متوقع يشوفنا في النهائي ومحدش كان متوقع العلاقة الإنسانية بين اللاعبين».
واختتم: «ما حدث اليوم وفي البطولة في ميزان نقاط محمد صلاح العام القادم حين يتم اختيار أفضل لاعب في العالم بقول لصلاح ضع كل حزنك وحزن زملائك أننا نوصل كأس العالم».