«قاصد يشهر بيا ويدمرني».. معلمة الدقهلية تكشف دافع مصور فيديو الرقص

أكدت آية يوسف معلمة الدقهلية ضحية انتشار فيديو الرقص الخاص برحلة لمعلمي المنصورة، أن لديها ثلاثة أبناء بنين حالتهم النفسية اتدمرت بسبب تداول فيديوهات الرحلة الخاصة بها وقالت «زملائهم في المدرسة بيسألوهم على أمهم وعن الفيديوهات» .
وقالت في تصريح ل«المصري اليوم»: «اللى صور الفيديوهات كان قاصد ومتعمد يشهر بى وده واضح جدا لأنه عمل زووم على أنا بس رغم أن كان في مدرسات غيرى بيرقصوا وتقريبا كل الرحلة رقصت سواء ستات أو رجالة لكن الفيديوهات اللى تم نشرها كان مقصود بها تدميرى وسواء رجل أو ست إللى عمل كده منه لله لأنه دمر أسرتى وأولادى، والولاد حاليا مش قادرين يروحوا المدرسة ونفسيتهم أصبحت مدمرة بسبب انهيار الأسرة وكمان لأن امهم أصبحت حديث للناس وكل واحد نصّب نفسه قاضى وجلاد وهم كانوا معى في الرحلة وشافوا كل حاجة وعارفين إن امهم مظلومة»
وبكت وهى تقول: «اللى صورنى ونشر الفيديوهات والصور قاعد في بيته دلوقتى وسط أولاده لكن أنا وولادى أصبحنا لوحدنا وسيرتنا أصبحت لبانة كل من هب ودب يعمل واعظ ورقيب على الأخلاق رغم إن كل واحد في حياته الخاصة الله أعلم به، وإذا كنت لسه مش عارفة مين عمل كده لكن هو انسان مريض وربنا هينتقم منه لأنى من وقت الواقعة بأصلى وأقول حسبى الله ونعم الوكيل فيها لأن الفيديوهات كان مقصود انها تشهر بى وكانت بتقرب بشكل يخلى اللى بيتفرج يفتكر أن في حاجة غلط لكن وأقسم بالله كلنا كنا بنرقص وكل اللى موجود كان معاه أسرته وكلنا كنا في مكان مفتوح بنضحك وبنلعب وبنتسابق لكن مكنتش أعرف أن بيننا انسان أو انسانة معدومة الضمير بالشكل ده»
وأضافت: «أولادى كانوا بيفرحوا بالرحلات دى وبينتظروها لكن دلوقتى اتعقدوا من الناس والرحلات ومش عايزين يخرجوا من البيت ولا أنا رغم أن عندى امتحانات الماجيستير والمفروض إنى أكون بستعد وأذاكر لكن للأسف حاسة أن كل حاجة انهارت علشان ناس بتتسلى بسمعة الناس وربنا أعلم بكل واحد وحسابنا كلنا عند ربنا وهيجازى كل واحد بإللى عمله»
وتابعت «أنا بأقول تانى أنا معملتش حاجة غلط تستحق التعليق على المشنقة كده أنا كنت في رحلة لمعلمين ومعلمات بأسرهم وكلنا ضحكنا ولعبنا وررقصنا وهزرنا لكن كل واحد شاف اللى حصل من وجهة نظره هو بس وبالصورة اللى صدرها له اللى صور الفيديو لو الصورة كانت أكبر كان ظهر باقى الناس اللى بترقص وتلعب معنا لكن هأقول إيه غير منه لله وربنا ينتقم منه اللى صور ونشر»
واسنطردت: «ياريت الناس تنسى وتبطل كلام في القصة دى وبأقولهم خلاص بيتى اتخرب وشغلى اتدمر وأنا وأطفالى حالتنا النفسية سيئة إيه المطلوب تانى علشان تسيبونا في حالنا».
وكان على عبدالرؤوف، وزارة التربية والتعليم في الدقهلية قرر إحالة 5 معلمين بإدارة غرب المنصورة التعليمية للنيابة الإدارية، بعد التحقيق معهم بالشؤون القانونية بالمديرية لقيامهم بالمشاركة في وصلة رقص على مركب نيلية أثناء مشاركتهم في رحلة نظمتها نقابة المعلمين بغرب المنصورة، بعدما قام بعض الأشخاص بتداول فيديو لهم أثناء الرقص على مواقع التواصل الإجتماعى.
واقرأ أيضا:
بعد وصلة رقص على مركب نيلية.. إحالة 5 معلمين بينهم سيدة للنيابة بالدقهلية (صور)
«صفع المدرس وقيده لنجله ليضربه بالحذاء».. ولي أمر يقتحم مدرسة في الدقهلية (فيديو)
«جوزي طلقني والناس دبحتني».. معلمة الدقهلية ضحية فيديو الرقص تعلن انفصالها