هجوم على وزير الداخلية بعد حديثه عن هروب ضابط ضرب أعين المتظاهرين

أثارت مداخلة هاتفية لمنصور عيسوى، وزير الداخلية، مع برنامج «القاهرة اليوم»، تعليقات على مواقع التواصل الاجتماعى، حيث جاء تعليق: «الملازم أول محمد صبحى الشناوى كان على اتصال بقياداته، والذين نصحوه بأن يسلم نفسه للسلطات المختصة، غير أنه هرب ولم يعد أحد يعرف مكانه».
ومن التعليقات على موقع «فيس بوك» سيد جاهين: «الله عليك يا وزير.. اصحى يا حكومة، اصحى يا مجلس الوزارة، اصحى يا مصر». يونس محمد: «الكلب هرب.. لكن الطوق مازال فى أيدى المتظاهرين». محمود عبدالنبى: «همّا مش قالوا خبوه فى مبنى سيادى يعنى المخابرات، وكمان أسرته، يبقى مين متواطئ؟ مين اللى ادّاله الأوامر؟ مين بيدلع فى أم البلطجية دول؟ همّا عايزينها ثورة مسلحة ولا إيه بالظبط؟ لو عايزينها سوريا هنخليها ليبيا». إبراهيم المغربى: «فيه حد يصدق الكلام ده».
يمنى على: «يعنى بجد ليه عين يقول الكلام، نصحوه قالوا له يا حبيبى سلم نفسك عشان نحاكمك بس منقدرش يعنى نجبرك». حسان سامى: «هرب ليه؟ كانوا حابسينه فى عشة فراخ؟». نشوى عثمان: «الغريب إن عيسوى ماقالش: إحنا ماعندناش شناوى».