الفسقية..! عبد العزيز محمود

كانت مكالمة خاطفة ودرامية ...
-بتقول ايه يا بني آدم؟ ابو الوفا بيه مات! ازاي الكلام ده؟!
-زي ماباقول لسعادتك كده! أنا باكلمك من بيته والصراخ الحياني جايب آخر الشارع!
-الله يرحمك يا ابو الوفا ! وما تعرفش يا برعي جنابه مات ازاي؟ قصدي يعني مات بإيه!؟
-والله يا افندم بيقولوا ان سعادته مات من الخضة؟
-ايه الكلام ده!؟
-أهو ده اللي حصل سيادتك! بعد ما جنابه فتح مشروع الفسقية مع سيادة المحافظ والجماعة بتوع المجلس المحلي وكان طاير من الفرحة جات له مكالمة عكننت مزاجه وطيرت برج من نافوخه! والظاهر والله أعلم حد من البهوات الكبار هزأه جامد واداله الطريحة!
-الله !!...مش هيه دي الفسقية بتاعت كل مرة ؟؟
-وهي فيه غيرها؟؟ أهو عمال يكسرها كل سنتين ويوضبها وبعدين يفتحها من جديد!!! وكان عشمان النوبة دي ياخدوه في حركة المحافظين اللي جاية !!!
-الله يرحمه ويحسن اليه!! بس والله الراجل عمل كل جهده وخلاها فسقية ملوكي ما حدش يحلم بيها!!
-ما هو ده اللي جاب داغه!!! تخيل سعادتك ابو الوفا بيه بعد ما قص الشريط وفتح المحبس... الفسقية ما طلعتش غير سرسوب مية والناس كلها قعدت تضحك وتتريق!!!
-والبهوات الكبار طبعا عرفوا الحدوتة !!؟؟
- وهوه فيه حاجة بتستخبى سعادتك !! دا جنابه اخد مهموز إنما ايه؟ ... وصاية!!!!
-عالم قليلة اصل بصحيح!! يعني الراجل ح يقطع نفسه؟؟..المهم انها في الآخر طلًعت مية مش هوا !!!
-واضح سعادتك ان البهوات الكبار كانوا مستحلفين له على غلطة!!
- اييييييييييييييه الله يرحمك يا ابو الوفا بيه ويحسن اليك!!!!!!! الا قل لي يا برعي ما عرفتش ح يجيبوا مين مطرحه؟!!
-وده كلام برضه؟! سعادتك طبعا.....همه البهوات الكبار ح يلاقوا احسن منك؟!
-تفتكر يا برعي ممكن يجيبوني بعد البلاوي السودة اللي عملتها في مشروع اللي يحب النبي يزق!؟
-أمال ح يجيبوا مين يعني؟.. الناس كلها بتقول ان سعادتك تقريبا المرشح الوحيد!!!
-ايوه بس انا سامع ان سنطاوي بيه ابو لبدة بيجري وراها من زمان! وانت عارف ابو لبدة؟!!
-ابو لبدة مين يا باشا؟ صدقني ما حدش ح يمسك مكان ابو الوفا بيه غيرك!.. وبكره أفكرك!
وبعد أيام صدر قرار بتعيين قتاية بيه الجعر مكان ابو الوفا بيه الله يرحمه....
-ازاي ده يحصل؟! ده كلام فارغ وقلة أدب ! قتاية يمسك مكان ابو الوفا !! قتاية الجربوع اللي كان بيشيل لنا الشنط؟!
-تخيل يا أفندم ! كنا فاكرين سعادتك اللى جاي ....وفي الآخر يجيبوا لنا قتاية!!
-وده بيفهم ايه ده في الفسقيات؟؟ ده جاهل ومحو امية!!!
-بيقولوا سعادتك انه قعد لابد في الدرة لغاية ما اطمن ان ابوالوفا بيه اتكل على الله!!!!!! وبعدين جرى على البهوات الكبار وعمل لهم البحر طحينة وأكل بعقلهم حلاوة !!
-ايوه بس ده ما كملش تعليمه ويا دوبك بيفهم في البكابورتات!! يا راجل ده ماسك ادارة المجاري من ساعة ما اتعين!
-الناس بتقول ان البهوات الكبار اختاروه عشان -عقبال أملتك -عايزين يحولوا الفسقية لمحطة صرف صحي!!!!!!