اسماء محفوظ تكتب :فضيحة اسماء محفوظ قبل الثورة

انتشر أووي فيديو يخصني على فيسبوك ودا كان أول مرة اعمل فيديو في حياتي في أول 2011 وكان بعنوان دعوة للتفكير .. ده اللينك الأصلي للفيديو وأرجوكم اقروا المناقشات أسفل الفيديو
http://www.facebook.com/video/video.php?v=10150357429740230
يؤسفني اني أضطر اشرح الفيديو.. وده مش دفاع عن نفسي عشان مبقاش فارق معايا مين يقول ايه ومين ميقولش ايه
انا الخاينة العميلة الي بتتمول بملااايين لتخريب البلد وانا اللي موقفة عجلة الانتاج .. لكن انا باشرح الفيديو عشان في ناس كتيير عمال تسألني وفاكرين ان الفيديو متفبرك . لكن الحقيقة ان الفيديو ده بتاعي وأنا مقتنعة بكل كلمة فيه
بس اسمعوه كويس
الوقت ده كان كل حاجة متلخبطة وكان اغلبنا يائس من فكرة الثورة ... وكان اغلب النخبة السياسية بتشتغل على أنهم يعملوا مليونية في التحرير ويبقى كده عملنا تغيير
بس انا كان عندي سؤال أو أسئلة ... هو يعني اي تغيير؟؟؟؟ لو سيطرنا على الحكم هنعمل إيه؟؟؟ هو كل حاجة في نظام مبارك عايزين ننسفها؟؟
لما كنت بسأل الأسئلة دي كنت بلاقي اجابات مختلفة ويا ريتها إجابات ... واللي جنني وقتها ان جمال مبارك كمان بقى بينادي بالتغيير
ولما قريت برنامج الحزب الوطني كان جميييل لكن مكنش فيه حاجة بتتنفذ
والقانون والدستور كان فيه حاجات جميلة ... ولكن مكنش فيها حاجة بتتنفذ
الوقت ده انا تنحت وعشان درست تخطيط استراتيجي فكنت بسال نفسي هو مين من السياسيين حاطط خطة للتغيير؟؟؟؟
وساعتها كتبت النوت دي ويا ريت برضو تقروا التعليقات إنها مهمة
http://www.facebook.com/note.php?note_id=476402864442
ثورة يعني ليها اهداف .. مليونية يعني عارفين احنا نازلين ليه وهنمشي امتى وعندنا بدائل
تغيير ممكن يكون ليه مفهوم كتييير ... وده عرفناه لما مبارك تنحى عرفنا ان المشكلة مش في الرئيس المشكلة في منظومة كاملة
قبل ما ندعو الناس لحاجة لازم نبقى عارفين احنا رايحين على فين
يوم 18 يناير لما عملت فيديو انا نازلة يوم 25 ... كان ساعتها خلاص بقى
مكنش ينفع السكوت وساعتها كان كل يوم يحصل حدث يدمرنا اكتر ... ولما ثورة تونس نجحت حييت فينا الامل تاني ان لا نقدر نعمل تغيير حقيقي
ولما في ناس ولعت في نفسها ومنهم واحد مات نزلت يوم 18 يناير التحرير صرخت في كل الناس انتو ساكتين ليييه؟؟
محدش عبرني وكل الناس وقفت تتفرج وانا كنت في حالة انهيار عصبي ولما كنت هتاخد وقتها من الأمن قررت إني اعمل فيديو وهنزل يوم 25 يناير حتى لو لوحدي .. مهما حصل لازم البلد دي يبقى ليها كرامة مش هستنى لما كل البلد تولع في نفسها
معنديش كلام تاني اقوله .... لكن في حاجة عايزة أؤكد عليها للمرة المليون
الثورة دي كانت نتاج تراكمات عمل ونضال اكتر من 30 سنة ..وان الشباب اللي ظاهرين على الساحة اللي انا واحدة منهم مش مفجرين ولا أبطال ثورة
عشان الأبطال الحقيقيين استشهدوا أو الإعلام مش بيهوب ناحيتهم
وعشان كمان ثورة مصر كانت نتيجة لاتحاد شعب وقام بدور عظيم منقدرش حتى لو حاولنا اننا نختزله في مجموعة اشخاص
لو انا عميلة او خاينة او منافقة او ممثلة ... ده مش فارق في حاجة عشان انا ليا دور زي كتييييييييير اووي ليهم دور
ودوري ده مش متوقف ان الناس تحبني او تكرهني .. أو حتى الناس تكدبني او تصدقني
فاللي عايز يصدق حاجة بيصدقها .. وصدقوا اللي عايزين تصدقوا
لكن المهم انكم انتم كمان تعملو حاجة ايجابية للبلد دي ... بغض النظر عن شباب الثورة
طلب اخيير .. اقروا التدوينة دي من 2009 .. بتكلم فيها عن مفهومي للتغيير وقتها
http://wolf-inside.blogspot.com/2009/12/2010-2011.html
تحياتي
أسماء محفوظ