يعنى أيه

يعنى أيه لما أجيلك
أول ما تشوفنى
تشكى همومك
أنا هشكى همومى لمين
أنا مش محتاج منك حاجه
أنا كنت عايزك تسمعنى
تواسينى وتخفف واجعيتى
جرا أيه ف الدنيا يا صاحبى
كل ما تشوفنى
تكيل الهم كيل ف وشى
كلنا ف مركب واحده
من زمان مش من النهارده
الهم راكبنا وتعبانين
مبقاش حيلتنا حاجه
الفواتير أخدت كل مليم
كهربا غاز تليفون ميه
ليه الفواتير بقت كتير
كل شهر بتزيد
والنار فيا بتقيد
حتى الأسعار زى النار
محتاجه مرتب فوق المرتب
ويمكن أكتر بكتير
قولى أعمل أيه
سايبنى أكلم نفسى
أخبط راسى ف الحيط
هيه ناقصه هتوجعنى
من فضلك يا عم إسمعنى
طيب قولى أروح أشكى لمين
هربان من العيال وأمهم
طلباتهم يا خويا كتير
قولى أعمل أيه
هكفى مين ولا مين
الرحمه يا ناس
أنا خلاص عقلى هيطير
أصحى الصبح على طلباتهم
بعد الضهر كله بيقولى هات
طيب أجيب منين
وواحد وواحد يساوى إتنين
مش تلاته ولا خمسين
إللى رايح أكتر من إللى جاى
الفلوس زى الطير
مركبه جناحات بطير
نفسى ف مره ترقد
ف عشها الدافى وتلبد
مترفرفش بجناحتها وتشرد
زى العصافير