وكيل صناعة «النواب» يطلق حملة «مش هنسيبكم» لمنع التنمر ضد ذوى الإعاقة

أطلق النائب محمد مصطفى السلاب، وكيل لجنة الصناعة بمجلس النواب، حملة مجتمعية وتشريعية، لإيقاف كل أشكال التنمر ضد الأشخاص ذوي الإعاقة، تحت اسم «مش هنسيبكم».
وقال «السلاب» في فيديو بثه على صفحته الرسمية، بموقع التواصل الاجتماعي «فيس بوك»، إنه بصدد التقدم بتعديلات على قانون العقوبات لمجلس النواب، لتغليظ عقوبة التنمر ضد ذوي الإعاقة.
وأضاف: «بنتفرج كتير أوي على فيديوهات على السوشيال ميديا، البعض بياخدها بشكل ساخر، لكن هي في الحقيقة مؤلمة جدًا وحزينة، بالإضافة إلى تصرفات بنشوفها في الشارع بتتخطى حدود السخرية، وبتوصل للإساءة والتنمر».
تابع «السلاب»: «أنا عارف إن ده مرفوض مننا، لأنه مش من أخلاقنا ولا قيمنا، ولا الاديان تقبلها، بس أنا شخصيًا حابب أقف قدام نوع أسوأ، وهو الشخص اللي بيتنمر على ذوي الإعاقة، إيه اللي يخلي حد يتنمر على شخص مش هيقدر يرد عليه جسديًا أو لفظيًا، وده امر مش مقبول، مش كده وبس لأ دا لازم يتجرم».
وقال: «مش هنسيبكم مقصود بيها الأشخاص المتنمرين اللي لازم يتحاسبوا، وكمان الأشخاص ذوي الإعاقة، اللي بنقولهم مش هنسيبكم وهنفضل معاكم وجنبكم».
ووجه النائب دعوة لكل الجهات، والمسؤولين، والمجتمع المدني، والنخبة من فنانين ورياضيين ومثقفين، وشخصيات عامة، وأجهزة الدولة، والمواطنين، للتضامن مع الحملة، لتوفير بيئة آدمية للأشخاص ذوى الإعاقة.