مجانية التعليم

مبدئيا أحب أؤكد ان مافيش حاجة في مصر اسمها مجانية التعليم، لأن أنا مثلا كانت مصاريف الجامعة بتاعتي في كلية طب 45 جنيه و لكن كنت بأدفع دروس بتاع 4000 ألاف جنيه كل سنة و معظم الطلبة كانو زي على اختلاف طبقاتهم. ده غير الكتب الاجبارية اللي الأساتذة بيجبرو الطلبة انهم يشتروها و الا مش حينجحو في العملي الخ...
ثانيا التعليم الجامعي الحكومي تعليم فاشل لأن عدد الطلبة في كل كلية بيتجاوز على الاقل بتلات أضعاف العدد اللي مفروض يكون موجود علشان الطلبة تستفيد و تكون امكانات الجامعة متاحة لهم بالكامل. و على فكرة التعليم الخاص مش أفضل كتير لأنه يدار بفكر الربح و بالتالي برضو عدد الطلبة كبير مع استثناء ربما الجامعة الامريكية و الالماني.
أنا لا اقتصادي ولا خبير تعليم بس ده رأي في موضوع مجانية التعليم:
1- تحديد عدد الطلبة اللي حيتقبلوا في كل كلية بحيث يكون عددهم مناسب من حيث المساحة و الامكانات، و بكده كل طالب يوصلو حقه من التعليم السليم.
2- عمل اختبارات قبول لكل كلية يدخل فيها المجموع الثانوي بجانب اختبارات قياسية خاصة بكل كلية و يتعمل لكل طالب اختبارات نفسية و مقابلات شخصية الخ بحيث يدخل كل طالب الكلية الجامعة اللي تناسبه مش من حيث المجموع بس و لكن من حيث الامكانات الشخصية كمان.
3- بعد ان يتم اختيار العدد المطلوب، اللي يقدر يدفع المصاريف الجامعية يدفع. و اللي ما يقدرش يتعملو دراسة حالة و يبقى تعليمه بالمجان. مع اشتراط انه يحتفظ بدرجة معينة من التفوق طول السنين و الا تتلغي المجانية و ده حيبقى دافع ليه انه يفضل شاطر و ما يبلطش في السكة. و ده طبعا يقتضي ان الامتحانات تبقى هي كمان قياسية و مش معرضة لأهواء الاساتذة عشان ما يبقاش الطالب تحت رحمة الاستاذ.
ده في رأي حل متواضع يوصل الدعم الجامعي لمستحقيه و في نفس الوقت يساعد في رفع كفاءة التعليم الجامعي. و طبعا في حاجات كتير لازم تتعمل مثل زيادة ميزانية التعليم و الاهتمام بالتعليم الفني...الخ