أنا واحد عندى برد !!!!!

أَضيت نَهارى فى العمل السفَّاح ... بكل هبل وبرضه بكفاح ... ووقفت انتظر ريحة ميكروباص فَوّاح ... وما خَبيش عليكم كنت ف وسط أُمم سداح مداح ... مَفْعُوص وِبَظَّة عينى ع الميكروباص اللى لاح ... الناس زَقَلِتْنى جوة الميكروباص مع التهليل والحمد بصياح ... وقعدت ع القلاب المكسور ضهره بكل إنشراح ... والسُواق أَمَر بأُجرِتُه وِكَشَّر وأشاح ... إديتوه لياخد أجرته قاللى مَعييش فكة قَط ... أنا هَدْييك بالباقى تكملة لآخِر الخط ... أنا قلت ياباشا الباقى معاك إمَّا يتْحَط ... انا م السعادة هفُط فَط ... ده أنا لو فكرت أخده أبقى بايع عمرى وأموت مُنحط ... إعتبرها نُقطة ف فرح م الأفراح ... ده ركوب ميكروباص وصفه يعِز ع المداح ... ولما خطر ف بالى أنزل وأكون مطلق السراح ... لَقَطتْنى بوعى الجماهير العاملة اللماحة ... زَقْونى لقيت نفسى متلَقَح على الأرض زى اللُقاحة ... والناس تضحك بكل بجاحة ... بَصيتلُهم بكل وقاحة ... وقمت من الأرض البراح ... لقيت نفسى مكرمش كلى ف بعضى ... وما بَيْنَ كلى وبعضى راح ... المهم ما طَوِّلْش عَليكُم وَصَلتْ البيت عشان أرتاح ... ضَربْت الجرس وِرَزَّعت على الباب ... مَنَا أَصْلى إتنشلت وضاع المفتاح ... فتحت المدام وهنتْنى على وصولى حى بنجاح ... إتْرَميت على الكنبة والمدام بتفرد فيَّه وبتبحث عن أى جراح ... وعلى أمل منى بِدُش هانى خلَعْت هُدومى بِهمَّة وفلاح ... وجْرِيت على الحمام رهوان ... منتظر دَغْدَغِت جسمى برذاذ الماء العذب القُراح ... لقيت صوت المدام بلهفة واهتمام ... تقول يا حُبى المَيَّه مقطوعة من الصباح ... وبإزازتين مية ساقعة إتْليَّط وأتوضيت لأصلى للفتاح ... وِأَكَلت غدايا فى العشاء ... مبقتش عارف الخضار من التفاح ... وفتحت الجزيرة أشوف أخبار الظلم اللى فاح ... وِدْنى زَنِّت معرفتش أميز ده كلام ولا نباح ... وِعينيَّه دغششت ولسه ببحلق لقيت النور انقطع ... أصله هاهاها فى إصلاح ... قلت أتكَلفِت وأنام ... عشان بكرة أستفتح بالرزق أِستفتاح ... ولما الصبح بنُوره لاح ... لقيت صوتى راح ... وجسمى بالألم باح ... وعقلى من الحر ساح ... ومناخيرى مسدودة وف ارتشاح ... لكن قلبى بينبُض بتسارع وصياح ... المرض ف بلدك خير من صحة فى غُربة مع ناس صِحاح ... وبعد شد وجذب وإلحاح ... رُحْت للدكتور وَنَا من فيزتُه بَهُر ... ولكن ايه اللى رمانى غير المرض المُر ... إدّانى لِستِت ادوية كتيرة غالية وعليها مُصِر ... واللى عَداها رخيصة ومفيهاش فايدة وِتْضُر ... وإن مختهاش لوم نفسك وإنتَ حُر ... أتاريه بيْبعْنِى لشركات الدوا عشان م الحرام يُصُر ... دى لَقطة ومن حياتى هتمُر ... وياعينى على بلدى لما فقيرها منها يئِن ... وهوه بيحبها ويشفى لوحده بحبها وعليها يحِن ... ويبقى لِيها على اللى يعاديها جِن !!!!.