الشارع بوك .. 85 مليون Like

على الفيس بوك فى خاصية جميلة جدا .. بحسها انها اداة تشجيعية كده الواحد يعبر بيها عن موافقته واحترامه سواء الكلام او الفيديو او المادة الصوتية او الصور .. اكيد عارفين ! الخاصية ده Like
ولما تعجبنا حاجة حلوة اوى بقينا نكتب 100 Like
لكن الفترة ده لازم يكون فكرك ووجودك ومشاركاتك بايجابيتك على الفيس بوك فى الشارع
ولو نزلت الشارع فى فترة معظمها ازمات وفيها رصد لسلوكيات الناس وشكل الشوارع والمواصلات , لكلام الناس , لفرقعة اعلامية أو لفتنة طائفية , لوقفات احتجاجية لمطالب حقوقية - وماتقولش عليها فئوية – لمين فى طرة ومين افرجوا عنه , لبلطجة وفين الامن ؟ , لاحزاب سياسية وتحركات شبابية لمرشحين لانتخابات رئاسية وللعيشة واللى عايشينها وحاجات تضايق وحاجات تفرح وحاجات تجيب الاحباط وحاجات تعمل لخبطة
ولاننا نزلنا الشارع .. لازم ندور على حاجات نعملها Like ! هو احنا هنسمع لمكبرات الصوت الفضائية ولا الاخبار الانتقالية ! لازم لو بنتكلم عن ايجابية لازم نشوف فين الحاجات اللى بتورينا ان بكره احلى واللى تملى قلوبنا بالامل , حاجات تحسسنا بمصر الخير بكره ولازم تشير علشان نبشر الناس بالخير.
حان وقت النظر.. لما هو جميل وكل ما هو ايجابى .. وكل ما يستحق منا الاحترام ويجبرنى انى اعمل له Like ويخلينى ابتسم واقول من قلبى احمدك يارب قد ايه انت كريم ولطيف بحالنا .. وShare للناس وهحكيلهم عنه عشان انقل لهم المنظر اللى شفته او الحوار اللى سمعته ودايما فيه امل.
لما تدخل مصلحة حكومية وتلاقى موظف يقابلك بابتسامة ويسهل عليك شغلك لازم اعمل Like
لما تلاقى صاحب محطة بنزين ومع ازمة السولار مش بيستغل الظروف ويبيع السولار بتمنه مش بضعف تمنه زى غيره لازم اعمل Like
لما تلاقى الناس بتنظم نفسها وتقف طابور وكل واحد ياخد دوره لازم اعمل Like
لما تلاقى شباب فى شغله وفى وظيفة ويعلن رضاه عنها ويرفض يسمع لحد فى هوجة التقديم على الوظايف الحكومية ويقول ده مكان حد محتاج للوظيفة لازم اعمل Like
لما تلاقى صاحب شركة تجارية ممكن يكسب من اى حاجة يبيعها يقولك عايزين نعمل منتجات تفيد الناس يصنعها الناس وتفيد البلد لازم اعمل Like
لما تبقى راكب فى وسيلة مواصلات وتحس من كلام الناس بالحرية فى كلامهم وحواراتهم وتلاقى فهم عالى جداااااا للامور لازم اعمل Like
لما تطلب من واحد تبرع لعمل خيرى وتلاقيه بيديك 5 جنيه وتكتشف ان كل اللى فى جيبه كان 10 جنيه لازم اعمل Like
لما تتحول خروجة الاصحاب لهنعمل ايه بكره للبلد وهنكون على قدر المسئولية ازاى لازم اعمل Like
لما تلاقى شباب كتير بينظفوا شوارعهم وبلدهم وييجى طفل صغير ومعاه جده علشان يساعدهم لازم اعمل Like
لما تلاقى حوار عالى ومحترم بين اراء مختلفة وتوجهات مختلفة وكله يسمع للتانى والغلطان يقول انه غلط ويكون هدف الحوار انهم يفهموا صح واللى مش عارف عايز يعرف لازم اعمل Like
..... محتاجين ناس يتكلموا فقط عن Like فى حياتهم عشان نتبادل مع بعض اكبر قدر ممكن من الحاجات تخلينا نعرف ان صبح جديد يعنى امل جديد .. يعنى ان ثورة مصر ليها 85 مليون Like
مين يحب يشارك؟