«المصري كيدز».. حدوتة حياة

حياة بنوتة جميلة.. وطول الوقت بتحب الحواديت الجميلة.. وفى كل حواديتها لازم الناس الطيبين بيحبو الخير وينتصروا على الأشرار.. وحياة عندها سلحفاة اسمها ستار وقط اسمه توم هما المساعدين بتوعها اللى بتحبهم وبيساعدوها في كل مغامراتها علشان تقدر تنتصر على الأشرار.. ستار بكل هدوئها بتقدر تخليها تفكر من غير تسرع.. وتوم بكل سرعته وشقاوته بيساعدها علشان تنتصر على كل الأشرار اللى في الحواديت.. ولأن حياة بتحب بطلات الحواديت وخصوصا الأميرة روبونزل اللى شعرها طويل جدا وقوى وبتقدر تنقذ بيه كل الطيبين.. فحياة قررت تحافظ على شعرها وتربيه وتقويه.. وفى الأول كانت بترفض تخلى ماما تسرحلها علشان مايطلعش في المشط شعرة ولا اتنين من شعرها القوى.. بس كمان لما قعدت تفكر مع السلحفاة ستار اكتشفت إن شعرها ممكن لو ما اتسرحش مايبقاش شكله حلو زى شعر روبونزل.
وكمان ممكن وهى بتلعب مع توم القط البطل الشقى ممكن ضوافر رجليه تشبك في شعرها ويقطعه.. وابتدت حياة كل يوم تسرح جزء من شعرها وتحلم.. وحلمت إن في يوم عصابة الأشرار جت علشان تخطف ستار.. لكن هي والقط الشجاع توم قدروا يدافعو عن ستار السلحفاة.. وستار طلع بسرعة فوق الشجرة ونط على زعيم العصابة خربشه وشبك ضوافره في شعره ووقعه على الأرض.. وحياة جت جرى وراحت فاردة شعرها قبل الباب وخلت باقى العصابة تتكعبل وتقع.. وبابا وماما صحيو من النوم وجم جرى قبضوا على باقى العصابة.. وستار وتوم ساعدوهم علشان يربطوا عصابة الأشرار بشعر حياة القوى.. ولما الشرطة جت الضابط شكر حياة على بطولتها وقالها إن شعرها جميل أوى.. وبالليل عملوا حفلة كبيرة يحتفلوا بحياة وبالبطل توم وبنجاة السلحفاة ستار.. وبابا جاب خص لستار وسمك لتوم علشان يبقوا مبسوطين.. وماما جابت مشط جديد لحياة يليق بشعرها القوى الجميل.. ولما حياة صحيت من الحلم كانت فرحانة وحكت لبابا وماما على حلمها.. وبابا وماما لإنهم بيحبوها عملوا حفلة زى بتاعة الحلم بالظبط.