61 او 71

فى حديث مش فاكرة نصه حالياً ومكسلة بصراحة أدور عليه..كان النبى صلى الله عليه وسلم بيتكلم مع احد أصحابه وبيتنبأ بحال المسلمين فى الازمنة اللى جاية من بعده...كان بيقول ما معناه ان المسلمين حيتفرقوا 71 او 61 شُعبه كلهم حيبقوا فى النار الا من اتبع سنته
ايام ما كنت حافظة الحديث ده و تلات ارباع احاديث النبى اكتر من اسمى كنت بقلق اوى واقعد افكر وابحث فى الكتب واقرا للعلماء عشان افهم ايه الشُعب المتفرعة من الاسلام واللى حتتحدف فى نار جهنم دى
فى بحثى فهمت ان كل مجموعة سَمت نفسها اسم وحكمت ان "طريقتها" هى الافضل هما فى الحقيقة حطوا نفسهم وسط ال 71
فهمت ان السُنة اللى متبعيها حينجوا من النار هى غير السُنة اللى الناس فهماها...مش جلابية قصيرة ولحية وسبحة ...الخ ، لأ...يا ريتها كانت بسيطة كده كان زمان الجنة مساعتناش...
وفهمت ان ربنا مخلقش الاديان عشان الناس تستخدمها عضويات زى النوادى كده
انا مؤمنة ان تقسيم الدين الى فِرَق مش دين خالص
تسمية شوية مسلمين ب "اخوان" وشوية تانيين " سلفيين" وحبة "تبليغ" حبايبى من ايام الجيزة وجماعة" انصار السُنة" وعِد حضرتك اسماء الجماعات حول العالم حتلاقيهم كتير...مش 71 ولا 61...بس لو شفت الاختلاف فى المناهج بين غير الجماعات حتلاقى العدد ظَبَط
انا مؤمنة ان الدين كان مقصود منه بيان واضح لفكرة الايمان...خطاب ربانى لعقول العباد عشان تصحصح وتعمل الفكر
انما الانسان ظلم نفسه كالعادة وبعتر الهدية وقسمها ...ويا ريته لما فكر باختلاف عن غيره سكت واحترم افكاره تواضعاً الى الله...لأ...ازاى...ميصحش...لازم يفشخ اخوه الانسان ويعايره ان هو اللى اخترع الطريق وان اى طريق تانى فى النار وبئس القرار
ودى الحقيقة...المناهج اللى بتكفر بعض كلها متلزمش ربنا فى حاجة وكلها اونطة
لان السُنة المُنجية هى : حياة النبى...والنبى مسماش طريقته...وكتير كان بيختلف حُكمه على الشىء حسب اختلاف ظروف الشىء او الناس...كان سلس...متفهم...دقيق...ليّن...رقيق...حنيّن...عمرك سمعت عن صحابى سلفى ومراته اخوان وحماه تكفير وهجره؟؟
اختلاف الناس بعد عهد الصحابة دليل تقوى؟؟
تفتكر ربنا عايز ايمان مستقر فى القلب وخير بيعم الجميع ونزاهه بترعى الحقوق وشرف متصان واعراض نقية وامخاخ ذكية وعدالة وتطبيق كل ده وقت الشدة ووقت الرخاء سواءَ بسواء...ورحمة ببعض لما نغلط وتسامح لما نقصر وعفو لما نقدر...اعمالاً برحماته هو نفسه علينا وهو القادر على كل شىء...ولا عايزنا لابسين بادجات وكل واحد معاه كتيب "رؤية الجماعة" بتاعته؟؟
هل حيبقى فيه نضورجى على باب الجنة بيكشف على الكارنيهات فيدخل الاعضاء بس؟؟ وساعتها لازم ابقى عضوة فى انهى جماعة؟؟ الجماعة اللى حتضمنلى انى حدخل الجنة لما ابقى عضوة فيها تقول..
الموضوع مش كده؟؟ كلنا داخلين؟؟ طب قارف #$$% امنا ليه يا عم؟؟
المُسمى: مُسلم
المعنى: بتحاول ونفسك وبتسعى انك تحب ربنا وتحب الخير اللى ربنا بيعلمهولك كل لحظة انت عايشها
الطريقة: لا طريقة...لا مُسمى..لا جماعة..لا وسيط بينك وبين الله...لا مُعلم للايمان...لا مرشد للمسلمين...مُرشدك قلبك ومُعلمك القرآن والطريقة بتاعة النبى بالفهم الصحيح ...ووالله والله والله...علم اتعلمته بقلبك من القرآن أصح وأقيم ألف مرة من ميت شريط لشيوخ الطريقة اللى كل واحد منهم وظيفته الاولى هى جذب مسلم آخر لجماعته ...زيادة عدد وبالتالى زيادة نفوذ بتوصل لهدف ما لا يعلمه الا الله
انت فاكر لما واحد اخوان ولا سلفى ولا غيره يبقى رئيس جمهورية حيبقى معصوم؟؟ مستبعد يعمل زى حسنى ويشفط البلد؟؟ تبقى ولا مؤاخذة عبيط..عارف ليه...عشان المؤمن واللى حب سُنة النبى مش ممكن يقعد يخطط عشرات السنين عشان ياخد سُلطة...عارف ليه؟؟ البنى آدم المؤمن فاهم كم المسؤلية اللى عليه من حكم شعب وخوفه على نفسه من فتنة السلطة بتخليه مش ممكن يرشح نفسه ويسعى...عشان كده كان الحكم ايام الصحابة كان بالتوصية/التكليف/ المبايعة...ويبقى الصحابى من دول حاكم بلد وهو كاره عيشته وعينيه فى وسط راسه وبرضه سبع الرجال وكله بس كان يقعد يدعى ربنا انه يثبته...فتنة السُلطة جبارة بس محدش فاهم
بعيد عن السياسة...
الايمان اعلى من ان بشر يسوق قلبك له...الايمان اعلى خصوصية بين خالق الكون ...خالق الحياة..اللى بيوهبك كل نَفَس...اللى سايب قلبك يدق...اللى سايبك تعانده وتعصيه وتتذاكى على اوامره...اللى صنعلك كون بحاله عشان صنفك يعيش ويتمتع لعلك تعرفه وتقدر هديته وتشكره...بين الله وبينك
مينفعش ابداً تقبل ان كلمة "يا رب" ينطقها لسانك بصوت واحد تانى غيرك انت
منهجك انسجه انت...عَرَفه انت...نقيه انت...اغلط فيه وامسح وعيد من الاول...اغلط فيه وقطع الصفحة واكتب على نضافة...اغلط فيه وخليهادام عينك واقلب الصفحة وحَسِن
بس انت....كتابك انت..بخط ايدك
متغشش من بليد