باسم يوسف يرد على «واقعة مسرح لندن»: «لو عايز أحرض كنت حرضت من زمان»

رد الإعلامي الساخر باسم يوسف على ما وصفته وكالة أنباء الشرق الأوسط الرسمية ب«أإهانته على مسرح لندن»، وقال إن «أجهزة معينة سلطت 6 أشخاص للتشويش عليه أثناء وقوفه على أحد مسارح لندن».
وقال «يوسف»، عبر حسابه الرسمي على «فيس بوك»، اليوم الخميس: «للتوضيح بس عشان اللي حصل في لندن، طبعا في عناوين بتقول إني عملت عرض مسرحي يحرض ضد مصر وفيه مصريين هاجموني وشتموني والكلام المحفوظ ده».
وأضاف: «الحقيقة إن دول كانوا عبارة عن خمسة أو ستة واضحين إنهم مزقوقين من الأول وعمالين يغلوشوا عليا من الأول، واللي يطّلع يقول أنا خاين واللي يطّلع يقول إن السيسي هو مصر ومصر هي السيسي، واللي يطّلع يشتم، عرفت بعد كده لما وريت صورهم لناس أعرفهم في لندن إن دول محترفين غلوشة وبلطجة ومزقوقين من أجهزة معينة، وبيكتبوا تقارير في المصريين اللي هنا، بل إن فيه واحد منهم معموله محضر هنا عشان هدد واحدة من المتظاهرات قدام السفارة بالقتل».
وتابع: «المهم أنا رفضت أن يتم إخراج أي حد من العرض وكنت متوقع إن الموضوع كله معمول عشان يتم تصوير دقيقتين وينزلوا على النت وده فعلا اللي حصل بعد نص ساعة من نهاية العرض ونازل مع ترجمة وآخر حلاوة، المهم كان فيه ناس في المسرح مع النظام وضد النظام ولا حد حس إن فيه إهانة لمصر أو تحريض لا أي حاجة».
وواصل: «أنا بأطلع في سي إن إن ووسائل إعلام مختلفة لو عايز أحرض كنت حرضت من زمان. بالعكس الناس على اختلاف ميولها استمتعوا جدا. المحزن إن موارد البلد بقت تتصرف عشان حبة بلطجية يدفعوا تذاكر عشان ييجوا يعملوا حركات عيال ويغلوشوا زي بلطجية الأفراح. أنا سعيد جدا بليلة إمبارح دي وباستقبال الناس ليا وياريت يتم توظيف موارد البلد في حاجات أحسن من كده».