«أبوحفيظة» يرشح السبكي للرئاسة: «عارف الناس عايزة إيه ونزلهم حلاوة روح» (فيديو)

قال سيد أبوحفيظة، الشخصية الساخرة التي يجسدها الإعلامي أكرم حسني، إنه سيرشح «السبكي» رئيسًا للجمهورية، نافيًا خوضه السباق، الذي سيجرى أواخر مايو المقبل، قائلًا: «فيه الأولى مني».
وأوضح «أبوحفيظة»، في لقائه مع الإعلامي خيري رمضان ببرنامج «ممكن» على قناة «cbc»، أن «الأوضاع اللي في البلد لا تسمح بإن يمسكها حد غير واحد قوي راجل له موقفه وراجل يقدر يجمع الناس ودي بتنطبق على راجل واحد بس السبكي».
وأضاف: «السبكي هو الوحيد في بلدك اللي عارف الناس عايزة إيه بيجمع الناس إنزل سينمات وسط البلد ساعة أفلامه الناس كلها متجمعة».
واعتبر أن «السبكي قوي فارض نفسه في كل الأفلام والممثل قدامه مكمل عادي فيه حد فتح بقه، رجل قوي وشجاع يا بيه وفاهم اللعبة، وقالك الحياة السياسية محتاجة ناس بترقص وناس ممشياها فرد دراع راح عامل تركيبة أفلام كلها كده عبده موتة وقلب الأسد، ولقانا بنفرفر آخر فترة راح منزلك حلاوة روح».
وتابع: «نعم للسبكي، هو الوحيد اللي يعرف الناس عايزة إيه، ولو السبكي رشح نفسه أنا صوتي للسبكي».
وبسؤاله عن موقفه من المرشحين الرئاسيين المحتملين، قال: «أنا جريء ولا بتهدد ولا غيره وأنا صوتي بكل أمانة لمرتضى منصور»، مبررًا اختياره لوجود صور له في مصيف جمصة ب«Hot Short»، في إشارة منه لخشيته من انتشارها بواسطة «منصور» إذا لم يرشحه للرئاسة.
وقال «أبو حفيظة» إنه إذا أصبح رئيسًا «هيدي الفن حقه لأنه يقدر يغير بلدك بالكامل»، مضيفًا: «نفسي الرئيس اللي يجي يحط لنا سماعات في أعمدة النور يجي ساعة العصرية يشغل لنا أم كلثوم، يشغل للناس مزيكا، ويشغل قرآن الصبح ومزيكا بالليل وترانيم.. وخلي الناس تنبسط».
وبسؤاله عن التشكيل الوزاري، الذي سيقدمه حال وصوله لمنصب الرئيس، قال: «أنا لو مسكت رئيس جمهورية هكلف فنان بتشكيل الوزارة، هكلف حمدي الوزير لأنه اسمه تكنوقراط وحده».
وأشار إلى أنه سيعمل على دمج وزارة السياحة مع وزارة الصحة، لافتًا إلى أن الفنانة آثار الحكيم سستولى مسؤوليتها، وأكمل: «وزارة العدل نجيب سامي العدل أو مدحت العدل، والرياضة إنعام الجريتلي سكينة في الحلاوة، وعندك مثلا عبدالرحمن أبوزهرة مايمسكش الزراعة ويخليهالك جنة، وأحمد الفيشاوي مسكه الكهرباء وأتحداك النور يقطع ده راجل بتاع فيش».
وبسؤاله عن الشخص، الذي سيتولى منصب وزير الإعلام، أجاب غاضبًا: «عيب أنت خانك السؤال ده»، لافتًا في الوقت نفسه إلى أن «الناس دي تحلف اليمين قصاد الفنان نبيل الحلفاوي، ومحمود البزاوي يمسك محافظ صفط اللبن، وحمدي الوزير رئيس الوزراء، و وزير الإسكان يجي أبوالفتوح عمارة، والبيئة سليم سحاب».