بالفيديو.. السيسي: «جيش مصر قادر يعمل المستحيل.. وزمايلي دايما مشرفني»

قال المشير عبدالفتاح السيسي، نائب رئيس مجلس الوزراء، القائد العام للقوات المسلحة، إن جيش مصر قادر على «عمل المستحيل»، مقدمًا الشكر لزملائه في القوات المسلحة.
وأوضح «السيسي»، في كلمة له أثناء تفقد اصطفاف قوات التدخل السريع: «الحقيقة زمايلي دايما مشرفني ودايما مشرفين جيش مصر بالأداء والانضباط وإنكار الذات».
وأضاف: «اسمحوا لي في البداية أوجه لكم كل التحية والتقدير، والنهارده بتواجدنا هنا مع قوات تشكل لأول مرة عشان تعزز وتزيد من قدرة الجيش على التدخل السريع».
وتابع: «التدخل السريع معناه قدرة مابتتوفرش كتير إلا للجيوش المتقدمة، والتدخل السريع معناه قدرة قتالية عالية وقدرة تحرك عالية، وقدرة قتال عالية»، مضيفًا: «القوات دي اتشكلت في وقت قياسي جدًا، وده بيأكد إن الجيش الوطني الجيش المصري الجيش المخلص جيش مصر قادر على أنه هو يعمل بجد المستحيل».
وأكمل: «اللي أنا شايفه قدامي النهاردة بفضل أجهزة القيادة العامة، بفضلكم بفضل الضباط بفضل ضباط الصف بفضل الجنود، وإحنا جايين النهاردة عشان نطمن وكمان عشان نسعد بصراحة».
وواصل كلمته: «كل اللي أقوله لزمايلي الموجودين أنا متشكر، وربنا يجعل جيش مصر دايما في السما بكم، ويجعل جيش مصر حامي لمصر وشعب مصر، والحقيقة اللي أنا شفته حاجة عظيمة جدا.. وقت زمني غير مسبوق».
وأشاد بقدرات قوات التدخل السريع، لافتًا إلى تمتعها ب«قدرة نيران وكفاءة قتالية والقدرة على التدخل السريع في أي مكان عشان نحمي بلادنا ونحمي أهلنا في مصر»، مضيفًا: «كل إضافة جديدة تمكن وتزيد من قدرة القوات المسلحة وكفائتها لازم نمتلكها ويبقى التدريب يوم عن يوم يزود هذه الكفاءة ويعززها، والتدريب المستمر الجاد هو اللي هيخلي كفاءة القوات عالية جدا جدا زي ما هي قوات مشكلة لمهام خاصة جدا جدا، وهنستمر في التدريب، والبرامج الخاصة بالتدريب للقوات دي غير تفليدية»، خاتمًا كلمته بشكر قادة وضباط القوات المسلحة.