سياسة...سياسة....سياسة

بقيت أحب اسمع حواديت السياسة جدااااااااااااااااااااااااااااا
لدرجة أني مبقتش اقرا الأخبار
ولا اتفرج على تليفزيون
ولا حتى أبص في جرنال
كفاية عليا أروح الشغل كل يوم الصبح...واسمع
هسمع بقى عامل البوفيه وهو بيقول رأيه للي داخلين المطبخ
واللي يقول مرة واحدة أنتوا عرفتوا أن بورندي وقعت عالاتفاقية..واتأكد وقتها أنك هتعرف قصة بوروندي من أولها لآخرها وهتعرف السر ورا اسمها كمان
وهتحس الموضوع ده أكتر لو أنت في مكتب كبير ومعاك موظفين تانيين من أعمار متفاوتة...بمعنى
هتسمع حد بيتكلم عنده 50 سنة وهتسمع حد غيره بيرد عليه عنده 30 سنة
وأكيد أنا في العشرينات ليا رأي مختلف - كالعادة - أو ماليش خالص!
ولو حصل ولقيتهم اتفقوا ومختلفتش آرائهم - وده خير لو حصل بعيدا عن الحقيقة ايه - هتلاقي أن الموضوع بدأ يوسع أكتر
ومش بس كده...دول كمان بيحاولوا يثبتوا لبعض أن كل واحد عنده معلومات أكتر
وهتخلص من بوروندي تدخل على أثيوبيا...ومنها على السودان اللي لو جيشنا شد حيله شوية هيدخلها معانا في الخريطة الجديدة
استنى استني...هو أنت مسمعتش أنهم هيعملوا اعتصام علشان يكبروا الخريطة حبتين؟
دول نازلين بكرة بشعارات (الشعب يريد توسيع الحدود) و (الشعب يطالب بعودة محمد على...مالناش دعوة)
الجديد بقى أن الاعتصام هيبقى عالحدود
بمعنى مش هندخل الناس ولا من السلوم ولا من المطار ولا من رفح ولا من أي مكان..
كلوا هيبقى في قبضة المعتصمين لحد ما حكومة "تيسيير" تعمل اللي عايزينه
طبعا أنت مستغرب أنا جبت الأخبار دي منين
مع أني مبقراش أخبار
ولا بتفرج على تليفزيون
ولا ببص في جرنال
ومبعملش أي حاجة غير أني بروح الشغل
طب ومش ده كفاية؟!!
أنا بسمع حكاوي ركاب أتوبيس 12 و 115...رايح جاي
وبسمع زمايلي والمديرين...وعم نبيل بتاع البوفيه
وبسمع رأي الناس القديمة اللي عاشت النكسة والحرب
وبسمع رأي د.شفيق على لسان كل المتابعين له على دريم والحياة والفضائية المصرية
صحيح مبسمعش محمود سعد...لكن هبقى مضطرة أتابع محمود خيري لأنه قرر يشتغل ببلاش!
فتفتكر ممكن نتكلم في ايه الفترة الجاية....غير السياسة والحريات؟؟؟؟؟؟؟؟؟؟؟؟؟؟؟؟؟
هو مش من حقنا؟؟؟
وعلى نهج العبيط...قصدي العقيد
سياسة...سياسة....سياسة