جامعاتنا فى «منحدر الصعود»!

مشى وساب كرسى الحكم.. يا خسارة مشى.. أيوه مشى للمكان اللى جالنا منه.. لكن الأهم، مشى وساب لنا أحلى كلام وأروعها تصريحات فى مدى التمكين من تلابيب البلاغة، وتراث رائع فى أدب الخطابة وفصاحة القول.. منها «إحنا فى منحدر الصعود»، واحتار واختار انت يا شعب اللى يعجبك النزول ولا الطلوع.. مشى وساب لنا تراث فى الأدب الخطابى الحلمنتيشى وكمان مصطلحات هى الأندر فى كل ما عرض علينا فى فنون مخاطبة الزعيم لعشيرته ومن والاها من أول يوم فى حكمه لما فتح الجاكتة وقال «أنا مش لابس قميص واقى»، وكأن الحكام بيتولدوا بيه أو بيستلموه قبل حلف اليمين.. ولما طرح معاليه السؤال العبقرى والأصعب والمفصلى واللى هوه فى النهاية خلاصة الحكمة والخبرة الإنسانية «القرد لو مات القرداتى يشتغل إيه؟»، والأهم والذى كنا نفخر به أنه ولأول مرة فى تاريخ المصريين يتولى حكمنا أكاديمى حاصل على شهادات من بلاد الفرنجة، واللى خلانا قلنا «كفارة يا شعب» معانا عقلية معملية فذة.
لكن الأجدر بالحديث هنا ما تركه لنا على أرض جامعاتنا المصرية.. ترك فتية وفتيات فى جامعة القاهرة يرفعون أعلام ورايات وشعارات الجماعة المحظورة والقاعدة، وكأن قلبه كان حاسس ياولداه إن رئيس الجامعة بينه وبين الشرطة ولا مؤاخذة حزازات.. ما بيحبهاش وبيحب أفلام الأكشن.. أضخم باب حديدى لأعرق جامعة يقع.. ووزير للتعليم العالى يؤكد أن الامتحانات فى مواعيدها ولا على باله تأثير المظاهرات والمولوتوف والمنازلات بالسلاح الأبيض مع أمن «على ما تفرج» وأستاذات تهن وتمنعن من الدخول بالعض وشد الهدوم وفضايح.. مايهموش تأثير ده النفسى على الطالب الممتحن، ولما كانت الامتحانات قفل البنات العضاضات الأبواب وطلعن زميلاتهن لقاعات الامتحانات بتسلق الجدران فى مخاطرة رهيبة وصراخ من أخريات، والدخول من الشبابيك فى الدور الثانى بعد تجاوز وقت الامتحان فى فيديو شافته كل الدنيا إلا الوزير ورئيس الحكومة.
مشى «المعزول وساب لنا» باكينام الشرقاوى وسيف عبد الفتاح «لحمل راية جماعة» أساتذة ضد الانقلاب «فى جامعة القاهرة لتعود لحكم البلاد والعباد بالشرع والشرعية بالإرهاب والبلطجة، ونقطة الانطلاق الأكاديمية من كلية الاقتصاد والعلوم السياسية، ونشرعلى مواقع الصحف تصريح نسب لعميدة الكلية بإقالة أساتذة جماعة «ضد الانقلاب» مما أغضب العميدة، وكان خبرعلى لسانها «نفت الدكتورة هالة السعيد، عميد كلية الاقتصاد، إنهاء عمل كل من الدكتورة باكينام الشرقاوى، مستشارة الرئيس المعزول، والدكتور سيف عبدالفتاح، مؤكدة أن «الدكتور يدرس علما وليس رأيا، وأن السياسة تمارس خارج أسوار الجامعة».
والدكتورة باكينام على فكرة كانت مساعدة الرئيس للشؤون السياسية ومش مستشارته، ومتهيألى تفرق يا دكتورة هالة.. وحكاية «الدكتور يُدرس علماً وليس رأيا» تتقال لو كان الكلام على أستاذ طب ولا هندسة، لكن لما يكون أستاذ شغلته فى مجال تعليم مهنة المشاركة فى صياغة الرأى السياسى وصناعته، فالحكاية تفرق لأنه لابد أن يمثل الأستاذ للطالب النموذج لأستاذ علوم السياسة مش أستاذ علوم الكدب واللوع والإرهاب الإخوانى.
أنا مش مصدق يا ناس.. دى جامعة أحمد لطفى السيد وطه حسين ونجيب محفوظ ونصر حامد أبوزيد ومصطفى مشرفة وبطرس بطرس غالى وأنيس منصور وأمينة السعيد وإبراهيم بدران وعائشة راتب... يالها من فضيحة!.
medhatbe@gmail.com