العيدية!

من عشر سنين..
" كل سنة و انت طيب يا حاج اشرف.. يعيد عليك الايام بخير.."
"هو مابيردش ليه؟!.. معلهش.. راجل كبير.. و بلاش نتعبه.."
من عشرين سنة..
"كل سنة و انت طيب يا حاج اشرف.."
"كل سنة و انت طيب يا جدو.. فين العيدية؟!.."
"كل سنة وحضرتك طيب يا انكل اشرف.. انا عملت لحضرتك الفتة.. يا رب تعجبك.."
من ثلاثين سنة..
"كل سنة و حضرتك طيب يا بابا.."
"ربنا يخليك لينا يا حياتي.."
"و هي دي اجمل لحظة في العيد.. بابا بيوزع العيدية.."
من اربعين سنة..
"كل سنة و انت طيب يا اشرف.. ماتتاخرش بالليل مع اصحابك.."
"و آدي العيدية يا سيدي.. ربنا يحميك يا ابني.."
من خمسين سنة..
"شوفتوا اشرف و شقاوته.. اول ما صحي سألني على العيدية على طول.."
"اشرف ده يبقى حبيب جدو.. ده اول حفيد.."
"كل سنة و انتم طيبين و دايما بخير و مع بعض.."
من ستين سنة..
"مبروك.. ربنا رزقنا اشرف.. و كمان في مناسبة العيد.."
"الف مبروك المولود الجديد.. و كل سنة و انتم طيبين.."
"اشرف شكله رزقه واسع.. الناس هتنقط و كمان تديله العيدية.."
"ربنا يوفقه في حياته بالرزق و كمان حب الناس.."
بعد سبعين سنة..
"كل سنة وانت طيب يا حاج أشرف.."
"انت عارف هو مابيسمعش.. و ما بيحسش بينا.."
"كفاية اهله اللى مابيسالوش عليه و لا بيعيدوا عليه.."
"بس بيدفعوا كتير جدا و كرماء جدا معانا.. انا خدت عيدية معتبرة منهم.."
"هو نايم و لا تعبان و لا ايه ياترى؟.."
يا ترى؟!..
يا ترى؟!..