«ميجا» نط عند البط

حيّرت قلبى معاك.. نشرت صحيفة «الدستور» القديمة منذ شهور أن الجهاز المركزى للمحاسبات يقول (إن الضبعة هى المكان الأمثل لإقامة المفاعل النووى) ثم نشرت صحيفة «الدستور» الجديدة منذ أيام أن الجهاز المركزى للمحاسبات يقول (إن الضبعة ليست هى المكان الأمثل لإقامة المفاعل النووى)، مما جعل المستشار «جودت الملط» رئيس الجهاز يقرأ على الهواء مباشرة الصحف القديمة التى تؤكد موقف الجهاز الثابت والموافق على «الضبعة»، وراح الرجل يتساءل: (ابحثوا عن صاحب المصلحة فى التشكيك فى «الضبعة»)..
ولأن الرجل قرأ صحفاً قديمة فتعالوا معى نقرأ خطاباً قديماً سبق أن قرأناه معاً لعلنا نعرف صاحب المصلحة فى تعطيل المشروع النووى المصرى: «أخى العزيز.. السلام عليكم ورحمة الله، وكل سنة وأنتم طيبون.. أكتب لكم من (الضبعة)، حيث أعمل وأبعث سلامى لأمى وإخوتى ولخطيبتى وأنا سمعت أن خطيبتى (لواحظ) حامل فألف مبروك.. اليوم هنا طويل ولكننا نقضيه فى لعبة (منتجعات ومفاعلات)، حيث يجمعنا كبير المهندسين صفاً واحداً ويكشف بيديه على جبهة كل واحد فينا ويقرأ المكتوب عليها ويقول له (انت منتجع) أو (انت مفاعل) ونبدأ نجرى ورا بعض عسكر وحرامية و(المنتجع) اللى يمسك (مفاعل) يضربه ويقعد مطرحه وساعات نلعب (ميجا) نط عند البط.. ما قولتليش هيه خطيبتى (لواحظ) حامل من مين؟ برضه من الجدع ده بتاع كل مرة؟!..
المهم، أحياناً يحضر مندوب وزارة الكهرباء من القاهرة بطيارة هليكوبتر من غير مروحة ويقف قدامنا ويدّينا ضهره وواحد فينا يضربه جامد وهو يلتفت ويقول مين اللى ضربه (منتجع) ولا (مفاعل) ويبلغ الوزارة بالتليفون.. على فكرة الجو هنا جميل ويحسسك إننا مش فى دولة ولا حاجة زى ما بيقولوا عندنا فى البلد، لأن (الضبعة) امتداد للساحل الشمالى وفيه ناس بتقول إنها امتداد للحزب وإذا فتحوها (مفاعل) هامسك (البوفيه) وإذا فتحوها (منتجع) هامسك (أمانة التنظيم)..
إمبارح كبير المهندسين نادانى وشرح لى أهمية المشروع وقاللى لازم نقدم حاجة لمصر وطلب منى أن أسرق العهدة، فطبعاً رفضت بشدة لأنه عايز ياخد التلتين ويدينى التلت فقط.. وسلم لى على شيخ الغفر وقول له بلاش تسيب شباك منور البلد مفتوح.. وعايزك تقول لخطيبتى (لواحظ) كفاية عيال أو تكلم الجدع ده بتاع كل مرة، وتفهّمه إننا صحيح مش فى دولة ولا حاجة لكن عليه أن يتقى الله لأن الناس هنا بدأت تتكلم وتقول إن الحكومة مش هتعمل (مفاعل) ولن تقوم بتخصيب (اليورانيوم) اكتفاء بتخصيب (لواحظ)».
galal_amer@hotmail.com