ناصر زمان

من يوم ماجيت شرفتنا نورك بدأ يمحى الظلام
واكمن قلبك حبنا علمتنا أحسن علام
واللى اتجرح من وسطنا صحيته من كل الآلام
طبعك جميل عودتنا بتقول وتصدق فى الكلام
والخير يجيلنا لحدنا مش خطبة تتقال والسلام
الدين علينا نسدده من غير ما نسمع لك نواح
والمفترى بتهدده يتهد ويصيبه الكساح
كل اللى كنت تحدده بيكون طريقنا للنجاح
وف كل حرف تردده بتأكده وتجيب سلاح
تبنى البلد وتجدده وتعلم الناس الكفاح
إنت اللى كنت تجيب لنا ويا العسل أحسن فطار
وف كل يوم كان عندنا وقت الغدا لحمة وخضار
ناكل ونشبع كلنا والحلو كان آخر النهار
كلك شهامة وجدعنة عرفتنا أحسن شعار
إيد كانت تدافع عننا والتانية تبنى للعمار
مصر بجلالة قدرها كان عندها فيه مال قارون
ضاع كل شىء معمول لها واتهدمت كل الحصون
جادت عيوننا بدمعها واتشققت كل الجفون
وانت اللى كنت تعزها وتحطها جوا العيون
وبكل حب تضمها صدرك عليها كان حنون
اعذرنى إن كات شكوتى خلتنى قدامك حزين
دا الهم بهدل جتتى وتعبت من غدر السنين
عمال أقول يا دهوتى وأنده ما فيش مخلوق يعين
والكل سامع ندهتى وجيرانى سامعين الأنين
ده كان نصيبى وقسمتى واللى اتكتب فوق الجبين
مش قصدى أزعل حضرتك دا انت البطل وانت الزعيم
والكل عارف مشيتك كات ع الصراط المستقيم
انت اللى كنت بحكمتك تشبه للقمان الحكيم
ولما زادت همتك شفنا على إيديك النعيم
ياريتها دامت عشرتك يا فارس السد العظيم
أيامها كنا نقربوا ونحسوا فى وجوده بأمان
والشلة كانوا بيهربوا ويصوصوا زى الفيران
كل الأعادى اتكهربوا ساعة ما قال للأمريكان
البحر أهه ياللا اشربوا ورونى إن كنتم حيتان
ليه كلكوا بتستغربوا مش هوا ده ناصر زمان
عضو اتحاد الكتاب