إسم على مُسمى

 (جودت) وله من وصف اسمه نصيب
راجل مؤدب وراجل محترم وأديب
عارف بيوت التعالب والقرود والديب
وعارف اللى نبغ فى الهبش والتهليب
شريف بطبعه ولا تنفع معاه ألاعيب
كشف لصوص البلد ولوحده عراهم
وطلع المستخبى من ورا الدواليب
               * * *
(الملط) بيه يا بلد مسك اللصوص وحده
كشف الحرامى وكل اللى انسرق عده
وكل خرم اتفتح قام بالعجل سده
خلخل فى جدر الفساد وبإيده قام شده
ووقف البلطجى خلاه لزم حده
يارب عينه وبارك فيه عشان بلدى
خايف تضيع البلد والحق من بعده
              * * *
(جودت) وألاقى فى جودتك أنا فين
خايف عليك م الديابة وعصبة الملاعين
فكرتنى بالجهاد وبموقعة حطين
وبعثت فيا الأمل وأنا كنت م اليائسين
مليون سلام يا بطل وتحية من ملايين
وقلوب بتسهر بكل الحب تدعيلك
ياريت نلاقى فى نزاهة حضرتك اتنين
              * * *
(جودت) ياريت البلد تولد متين زيك
زمن الجوالة اتولد خايف يموت بعدك
بالحق والعدل بتشيد صروح مجدك
عفيف وطاهر.. وسجل التاريخ عدلك
وكل حر وشريف الليلة يشهدلك
ياللى احتكرت الجمال والحب فى قلوبنا
يكفيك قلوب البلد صحيت على حبك
            * * *
فكرتنى يا بطل بمواقف الفرسان
فكرتنى بعنترة وأدهم وناس شجعان
فكرتنى بالهرم وبعظمة الإنسان
فكرتنى أبتسم وأبعد عن الأحزان
من كام سنة نفسى أشوف (جودت) وفرسانه
يارب ديم همته وزيده كمان وكمان
سيد أحمد الهمشرى
sayedelhamshary@Gmail.com