درس لأصحاب القمم الكلامية

انسوا حب الكراسى                   الكرسى يا ناس هيزول
بناء الوحدة ضرورى                 بالعرض أو بالطول
تمزيق الأمة خطر                     يخلى عزمها مشلول
ثبتوا الوحدة على                      منهج رب ورسول
جملوا وجوهكم بالصدق              بلاش كلام معسول
حرام تكونوا ملايين                   ومتكيدوش عزول
خطط مرسومة لتفريق               الأمة اصحى يا مشغول
دوسوا على الخلاف بينكم           وجهزوا يا عرب أسطول
ذنب أطفال غزة فى                 رقبة مين شوف كام مقتول
ربنا يجمع شملكم                    ونقط الخلاف تزول
زمان قالوا فى الأمثال              الاتحاد قوة وسيف مسلول
سمعنا كتير عن قمم                 ولا قمة لها مفعول
شرم الشيخ الكويت الدوحة ;        كله يحكى وكله يقول
صبر الشعوب نفد                   وأصبح عنكم معزول
ضرب غزة وصمة عار            والساكت عنها مخبول
طول ما انتوا مختلفين              العدو فرحان يدق الطبول
ظهرت النوايا فى قنابل             لا ينفع فيها دوا ولا محلول
عرفتوا عدوكم ألعن من            الهكسوس والتتار والمغول
غياب مصر عن القمة              لو غاب الأب من يعول
فلسطين قضية عربية               ومن غير مصر مفيش حلول
قلب العروبة هى                    والريس الراعى المسؤول
كلامه مدروس والشاهد            أكتوبر على الفعل والمفعول
لها دور بارز                       واللى ينكره حاقد أو مسطول
مصر أسامة وزويل ومجدى      ومحفوظ وياما فيها عقول
نظرتها مش سطحية              الحرب مش سيوف وخيول
هى اللى باركها المسيح          فيها المحبة نسيج مغزول
وحدة الصف هىّ الأمل          من غيرها تبقوا ديول
يا تتحدوا يا ترحلوا كفايا         خلاف كده مش معقول
أحمد خليل السوهاجى
المحرر: الأستاذ أحمد خليل السوهاجى عامل بجامعة سوهاج حاصل على شهادة محو الأمية.. القصيدة من نظمه، ويبدأ كل بيت فيها بحرف طبقًا لتسلسل الحروف الأبجدية.. هنيئاً لنا بأمثاله.