د. محمد السيد سعيد

راح يجيلنا تانى بكرة            زى ما بييجى القمر
مهما طوّل انتظاره               ومهما طال بيه السفر
اللى شال هم الغلابة              وعاش على حب البشر
واللى نظرة عينه لسه            معلمة فى قلب الحجر  
واللى كلماته وكتابته              فيها إشراق الخبر
راح يجيلنا تانى بكرة             زى ما بييجى القمر
                         ■ ■ ■
راح يجيلنا تانى بكرة             واحنا وياه مشتاقين
والأمل اللى فى قلوبنا             راح يعيش وياه سنين
كل يوم أشواقنا تكبر               كل يوم نزداد حنين
لسه صورته فى كل مطرح       لسه صورته فى كل عين
لسه أحلامه الكبيرة                هيه عزم المظلومين
راح يجيلنا تانى بكرة             واحنا وياه مشتاقين
                        ■ ■ ■
راح يجيلنا بكل أمله               واحنا وياه مشتاقين
راح يجيلنا بكل عزمه             يفتح الباب للغلابة  
راح يجيلنا قبل مصر              يقتل الخوف والديابة
قبل ما تزيد الوحوش               ما تبقى وديانها خرابة
راح يجيلنا ياخد بإيدنا              زى أحمد والصحابة
راح يجيلنا كل أمله                 يفتح الباب للغلابة
                        ■ ■ ■
المرض ماسابوش يعالج           مصر من داء السكات
المرض عامل مؤامرة             وحاوطه من كل الجهات   
المرض زى الحكومة              هيه والسرطان خوات
قتلت الناس بالطوارئ             لما عزم الشعب مات
لما نهبت كل حاجة                حتى مسبتش الفتات
سيد أحمد الهمشرى
sayedelhamshary@gmail.com