أم الشحات وابنها فى استقبال البرادعى

سهر الشحات مع صديقيه أحمد البرعى الطالب فى جامعة الأزهر ومينا وليم الطالب فى‎ طب القاهرة فى تجهيز لافتة كبيرة ليأخذوها إلى المطار لمقابلة الدكتور محمد‎ البرادعى عند عودته إلى مصر قادما من فيينا بعد انتهاء فترة إدارته لوكالة الطاقة‎ الذرية‎..‎
وأحمد البرعى ومينا وليم هما صديقا الشحات وزميلاه فى ملعب الكرة الذى قاموا‎ بتسويته بعد هدم عمارة مخالفة بين المنيرة والسيدة زينب.. أتى الشحات إليهما وأنسا‎ إليه مثل كل البسطاء من المصريين مهما اختلفت ظروفهم الاجتماعية.. يتحمل أحمد ومينا‎ كل تساؤلات الشحات البسيطة‎.‎
‎-‎هى يا دكتور وليم وكالة الطاقة الذرية يعنى إيه؟‎
‎-‎يعنى هى المكان المسؤول عن‎ المشاريع التى تقوم بها كل بلاد العالم ليكون عندها صناعة تدخل فيها الطاقة‎ الذرية‎.‎
ويرد أحمد: -الراجل ده.. الدكتور البرادعى كان ضد الحرب على العراق يا شحات وأخذ‎ جايزة نوبل للسلام‎.‎
وتنطلق طلقات الأسئلة الساذجة والنافذة من الشحات‎.
‎-‎يعنى البرادعى أقوى من‎ العرب؟ أصل ما حدش فيهم وقف ضد حرب العراق‎!!‎
ثم يقول: -أنا رايح أقابله معاكم لأنكم أصحابى ومقتنعين بيه لكن أنا لسه ما‎ أعرفوش‎..‎
وتتدخل أم الشحات بصراخها: -يالهوى.. هو انتو خدتوا القماش بتاع التنجيد اللى‎ باسترزق منه حتعملوه يفط للانتخابات‎!!‎
وتهم بأخذها منهم.. فيخطفها الشحات‎.
‎-‎إوعى يا أمى... إحنا رايحين المطار بكره‎ نقابل البرادعى أصله مرشح نفسه رئيس للجمهورية‎.‎
ويتدخل مينا بسرعة: -لسه مش مرشح نفسه.. لكن قال كلام كويس فى حق البلد والناس‎ طالباه يرشح نفسه‎.‎
وترفع أم الشحات صوتها: -وأنا مالى بيه.. تاخدوا القماش اللى هابيعه للعرايس‎ للتنجيد.. ياد يا خايب انته وهو ذاكروا أحسن ليكوا.. وانت ياد يا شحات.. شوف التوك‎ توك بتاعك.. إجرى على رزقك.. إحنا مالنا ومال البرادعي.. إحنا لاقيين ناكل؟
ويرد أحمد البرعى: -ياخالة لو كل واحد قال أنا مالى تبقى الدنيا باظت!! أمال مال‎ مين.. معلهش حنجمع من بعض تمن القماش ونديكى الفلوس‎..
ويدخل الأستاذ عبدالمعطى‎ مدرس اللغة العربية فى مدرسة السنية الإعدادية. -عدم المؤاخذة يا ست أم الشحات‎.. هيه يا أولاد جهزتوا القماش.. أنا جهزت الكلام اللى حيتكتب وعندى مدرس الرسم‎ الأستاذ مفيد عبدالجيد حيكتبه بخط جميل وهو معاه فرش كبيرة وبوية للكتابة. ويقول‎ الشحات: -حنحط اليافطة فوق السطوح.. نفردها وهو يكتب ولما تنشف ناخذها.. ع‎ المطار‎!‎
‎-‎حنكتب إيه يا أستاذ عبدالمعطي؟‎..‎
قال أحمد البرعى: -أنا مجهز تلات جمل تختار منهم واحدة‎.
‎«‎أهلا بك رئيسا‎ لمصر‎»
يقاطعه مينا: - لا، إحنا بنرحب من غير ما نقول كلمة رئيس لأن ده لاينفع من‎ غير تغيير الدستور‎.‎
‎-‎طب اسمع دى.. «مرحبا بالبرادعى مشاركا فى هموم الناس‎»
يقاطع أحمد‎ البرعى‎
‎-‎ولا دي.. معلش مع احترامى وانت أستاذنا ومربينا لكن هو لسه حيشارك فى‎ الهموم‎!!‎
ويقول الأستاذ عبدالمعطى: ودى آخر عبارة «أهل السيدة زينب والمنيرة يرحبون‎ بالبرادعي» يقول مينا وأحمد معاً: -أيوه دى معقولة دى كويسة جداً!! ويقول الشحات‎: -‎أنتم متأكدين إن كل السيدة زينب والمنيرة مرحبين؟‎..
أحسن حد يقول أنا مش عاوز أرحب‎.‎
يقول الأستاذ عبدالمعطى: -لا.. كل الدنيا مرحبة.. كل الدنيا يا شحات يا ابنى‎ عاوزة تغيير.. تدخل أم الشحات ومعها أم إبراهيم وعايدة عزيز الخياطة: -والنبى‎ تتفرجوا على ابنى وأصحابه.. خدوا القماش اللى باسترزق منه وحيعملوه يافطة‎ للانتخابات
neamelbaz@yahoo.com