كلمات ليست كالكلمات

قوموا اتحركوا القدس بتضيع من ايديكوا.. اعملوا حاجة ولاّ احنا هنتحايل عليكوا.. اعملوا حاجة الله يخليكوا.. القدس بتضيع من إيديكوا.. وآدى كلكم قاعدين.. راح فين النصارى فين المسلمين؟ فين إيمانكم بالنصر المبين؟ وآدى آلاف شهداء بيموتو بين إيدينا.. وكلام كتير عمال يتقال ولا حجة بتفدنا.. وآدى العراق ادمرت.. والناس قلوبها اتحجرت.. وحاجات كتير اتغيرت.. واحنا لسه زى ما احنا.. فوقوا ياعرب!
صلاح محمود محمد-القاهرة
الشهيد.. واللّه انت اللى عايش.. مش أنا.. دا دمك غالى عندى.. ولا يمكن يكون أبدًا.. فى يوم زيه زى دمنا.. واللّه أنا دايمًا باحسدك.. على دنيتك على عزتك.. على اختيارك لاخرتك.. فى دنيتك مدافع همام.. وعزتك عزة كرام.. وأخرتك لله شهيد.. هو له لوحده الدوام.. واللّه أنا دايمًا باحسدك.. يجعل ختامنا خاتمتك.. يا اللى ابيت تعيش.. الحياة وهى غاوية.. مذلتك.. واللّه أنا دايمًا باحسدك.. تموت شهيد.. أرحم من عيشة العبيد.. والنصر بكره ودا الأكيد.. ومش بعيد على اللى.. طول عمره عنيد.. ولا عمره خاف من الوعيد.. إنه فى يوم يموت.. شهيد.. ولا يعيش حياته م العبيد.. واللّه أنا دايمًا باحسدك.
مصطفى السرتي
اشمعنى انتى يا غزة.. متعالية ومش عايزة.. تتذليّ لإسرائيل.. يحاصروكى يحرقوكي.. من حقّك يحرموكي.. ما فيش فى ولادك ذليل.. العرب اللكاكين.. فى الجد اهم عاكين.. أمريكا ساعة ما تقول.. إسرائيل هيّا الغول.. مالكة الفرات والنيل.. مصرنا بحمل جبال.. وعراقنا بالاحتلال.. والباقى بهدّ الحيل.. النجمة السداسية بين خطّين محميّة.. كلام من حداشر جيل.. إسرائيل دى الحثالة.. لا كانوا أصل ولا كمالة.. لكن هبل المهابيل.. إمتى الغادر ترموه وف جحيمكم تشووه.. ويهوّى حاكم عليل.. غزة مش عاوزة غذاء.. ولا حتى عاوزة دواء.. عاوزة الرجال والخيل.. والحرب ع الإرهاب شنوّها من كل باب.. ولا يجيش غير الأصيل.
على قاسم ..المكس - إسكندرية