{Empty title}

يا شيخ اسكت
قلت لك اسمع كلامى
ده نصاب
وده حرامى
وده قاتل
وده لئيم
وقلت لك ممعناش
غير ستة جنيه
وما عملناش
غير تلات كبارى
من غير لا صحة ولا تعليم
وقلت لك ده ضلالى
ف عز الضهر
ياكل مال اليتيم
قلتلى إنت مش كويس
وعيالك تمام وف السليم
يا عم سامح
ده المسامح كريم
واحمد ربنا
يا عم
ما أنا بحمد ربنا
إحنا بس عايزين
حد يقول لنا
الدور هايجى علينا ونفرح
ولا صالة الأفراح
كاملة العدد
ومافيهاش مطرح
يا شيخ اسكت
ده أنا من كتر ما كتبت وجع
اتهيألى إن الفرح عيب
أو ممنوع
عارف لو نسيت
وكتبت قصيدة حب
أحس إنى عملت عمل
غير مشروع
ولو دق الباب
أجرى وأخبى قلبى
أحسن يكون بوليس الآداب
ويلفونى ف ملايا
ويعملولى قضية زنى
يا عم ما أنا بحمد ربنا
بقولك مفيش جوانا شىء
ولا معانا
ولا عندنا
يا شيخ اسكت
يا شيخ اسكت
وفضلت أقول يا شيخ اسكت
أتارينى بكلم روحى
ولا فيه شيخ
ولا قسيس
وتقريباً لما انفعلت
وقع الرز م الكيس
واتبعترت ع الأرض كل الحاجات
عجبك كده
يا شيخ اسكت