«المعلم عمة» يحييكم وهو محبط: محدش يطلب منى أمرجحه.. واللى يحب النبى يضرب 6 1x يطلعها 30

30 ابنًا وابنة و10 أحفاد و6 زيجات ومهنة منقرضة.. عزوة كونها المعلم «عمة» لنفسه، وعاش 63 عامًا على قناعة واحدة: ربنا لما بيحب بنى آدم بيبعتله رزقه..
لذا لم يفكر فى تغيير مهنته أو البحث عن أخرى تعوضه انقراضها وانعدام الطلب عليها.. شهرة المعلم «عمة» تجاوزت حوارى منطقة منشية ناصر التى يسكنها إلى مناطق إمبابة وحلوان والسلام حيث تنتشر ألعاب المراجيح والموالد، ويدين عدد كبير من صنايعية وأصحاب هذه المراجيح له بالفضل فى عملهم وتعلم صنعتهم، فهو أقدم صناع ألعاب الموالد والمراجيح والسواقى ليس فى القاهرة فحسب، لكن فى المحافظات أيضًا التى يصدر لها إنتاجه من الألعاب الشعبية.
سليمان محمد سليمان هو اسمه الحقيقى، لكنه اشتهر ب «عمة» والتى أطلقها عليه والده: أمى كل ما تخلف عيل يموت، أبويا خاف عليا أحسن أحصل اخواتى فسمانى «عمة» عشان أعيش.. ولما كبرت شوية وكملت 9 سنين علمنى شغلته وورثت عنه كار صناعة المراجيح وتشغيلها.
«عمة» يفتخر بالتطوير الذى أدخله على صناعته، ويعتبر نفسه من المجددين فيها، فقد أدخل الموتور على بعض الألعاب لتزيد سرعتها وليوفر طاقة العامل الذى يحركها، ويعتبر أكثر الألعاب شيوعًا هى «الجوز والإوزة والساقية والخيل والصاروخ والدولاب»: زمان كانت المراجيح بتتعمل من الخشب، دلوقتى دخل فى صناعتها الحديد لأنه أسهل فى الحركة وفى التشكيل ونبطنه بالخشب كعازل من حرارة الشمس.
ولأنه وحيد والديه قرر «عمة» أن يكون إمبراطورية تعرف باسمه، وأن تصبح له عزوة تغنيه عمن حوله، فتزوج 6 مرات بحثًا عن إنجاب مزيد من الأطفال ووصل عدد أبنائه إلى 30، لا يذكرهم كلهم ويتعمد هذا أحيانًا خشية الحسد، لكنه حرص على توريثهم مهنته، فأصبحت إمبراطورية فى المنزل وفى العمل،
ورغم ذلك يشعر بالأسى: المهنة ما بقاش فيها صنايعية زى زمان، حتى الناس مش بترحب بينا زى الأول، والواحد ما يعرفش يقف بمرجيحة لا فى منطقة راقية لأن البلدية هتطاردنا ولا فى حتة شعبية لأن أهلها فاكرين نفسهم اشتروا الشارع، وكمان الموالد ما بقتش زى الأول، قل عددها ومدتها، وبدل ما المولد يقعد شهر بيخلص بعد أسبوع، ده لو لقينا فيه مكان.. والسنة كلها بتعدى ما بنطلعش منها غير بمواسم العيدين وطلعة رجب وشم النسيم والكريسماس وموالد السيدة والحسين والسيد البدوى، أصل العيال فى وجه بحرى بيحبوا اللعب أكتر من عيال وجه قبلى.
ركز «عمة» فى مناطق حلوان والبساتين وإمبابة والمحافظات فمشاكلها أقل، ويقبل أهلها على المراجيح لعدم قدرتهم على الذهاب إلى الملاهى، ويعيب «عمة» على الأطفال الذين تركوا المراجيح والألعاب الشعبية واتجهوا لألعاب الإنترنت: العيال اتغيرت، فيه نوع ركوب المرجيحة بالنسبة له عيد، وفيه عيال بتحوش عشان تلعب أتارى.. ورغم الغلا اللى طال كل حاجة والمرجيحة اللى كانت بتتكلف ألف بقت بتتكلف 6 آلاف، وسعر ركوب المرجيحة لم يتغير، واللى معاه نص جنيه بيركب بيه.
المهنة انقرضت فى رأى «عمة» فلم يعد باقيًا سواه و3 آخرين فى المحافظات يصنعون الألعاب الشعبية ويسرحون بها، لكنه مازال محافظًا عليها لا يفكر فى كار آخر له ولأبنائه: نعمل إيه ما هو أكل عيشنا ولازم نحارب فيه لآخر نفس.. ولا عشان العيال اتغيرت نموت احنا من الجوع؟