حديث النفس

نفسى أحج وأطوف بالبيت            يبقى سمعت وأقول لبيت
نفسى أزور والصحة أنا فيها          يستر ربنا ويعديها
هحرم هنا وهروح ع البيت           أسعى وأطوف يبقى كده عديت
يوم عرفات هصعد فيه فوق           وادعى وأقول يبقى كده فيه شوق
والمزدلفة هقصر فيها                  مغرب عشا على طول صليها
منى وهصلى هناك فيه عيد           وادبح وأرمى وهبقى سعيد
وأدبح كبش واسمى عليه              وأخد الكبد أوام هقليه
شعرى هقصر فيه وأرميه             وأجرى هطوف على طول بعديه
يبقى ساعتها هقول حجيت            وإتمرمغت فى عتب البيت
وأرجع ذنبى يا ناس مغفور           مجبور خاطر مش مكسور
                                                               د. السيد محمد راشد
                                                         أستاذ جامعى أشمون - منوفية