كلمات ليست كالكلمات

* شايفك جميلة.. شايفك نبيلة.. شايفك خميلة.. حبك أمان.. شايفك أميرة.. شايفك منيرة.. شايفك كبيرة.. قلبك أمان.. شايفك كريمة.. شايفك عظيمة.. شايفك ربيبة.. حضنك أمان.. شايفك صبية.. شايفك ندية.. شايفك هدية.. من رب العباد.
محمد خلف أبوطاسة
كاتب صحفى - وعضو هيئة الفنون والآداب
* إمتى هرجع بلدى تانى.. خلاص كرهت الانتظار.. إمتى هرجع للأمانى.. إمتى ههرب م المرار.. إمتى هرجع حر تانى.. إمتى ينفك الحصار.. إمتى أبقى فى بلدى عايش.. عيشة جد مش هزار.. عايش أصارع عايش أدافع.. عايش أشارك فى القرار.. إمتى هرجع بلدى تانى..
 خلاص كرهت الانتظار.. إمتى هرجع أبقى مصرى.. مصرى بالمعنى السليم.. إمتى أعيش أيامى وأطوى صفحة الماضى الأليم.. يبقى لىّ كيان وصوت زى سعد وزى كامل.. زى عبده والنديم.. إمتى يبطل الجنيه.. ينحنى قدام الدولار.. إمتى هرجع بلدى تانى.. خلاص كرهت الانتظار.. بعد ما كان لىّ تاريخ يحكى بيه كل البشر.. سادك الجهل يا بلدى والخراب زاد وانتشر..
 مين هيقدر يبنى تانى.. أو يغير أى شىء.. يبقى فيه للظلم رادع.. والبرىء يصبح برىء.. إمتى هرجع بلدى تانى.. إمتى هابقى فى يوم جرىء.. مصرى من معدن نفيس بس يتلاشى الغبار.. إمتى هرجع بلدى تانى.. خلاص كرهت الانتظار.
أحمد رشدى فراج
الإسكندرية
* اطوى صفحات انكسارك.. وافتحى كتاب انتصارك.. ومهما طال ليلك يا غزة.. بكرة شمس النصر باقية فى نهارك.. بكرة نصرك المبين.. ترفعى علم الكرامة.. من رفح لدير ياسين.. وإوعى تتعاهدى معاهم.. إوعى تنسى يا غزة تارك.. مهما قطعوا النور عليكى.. ومهما حاولوا فى يوم حصارك.. صوبى عليهم سلاحك.. وسلطى عليهم نيرانك.. عمرهم ما يفكروا فى يوم ييجوا دارك.
أيمن محمد جادو - دمياط
aymangado@yahoo.com
* بحبها أنا ابنها.. حتى لونى زى تراب أرضها.. أسمر جميل لون ضفاير شعرها.. لا الأرض جابت ولا هتجيب فى يوم زيها.. بحبها رغم كل شىء بحبها.. بغنى لطول عمرها على الشاطئ مستنى مرسى لبحرها.. أصل انت مش فاهم دا نسمة ربيع تشفى عليل جرحها.. أنا ابنها بكلم بصوت عالى أهلها.. دا مهما طال الليل لابد هيطلع فجرها.. والحب يرجع ينتشر بين حبات رملها.. بحبها.
أسماء سعد
بنها - كفر الجزار
* جريدة المصرى اليوم حقيقية.. بتكشف الحقيقة مش حاجة تانية.. ومع الحدث ثانية بثانية.. بتنصر المظلوم فى كل الدنيا.. جريدة المصرى اليوم ميزان.. لا بتجامل مسؤول ولا فنان.. ودايماً فيها الحقيقة تبان.. لا بتوهمنا بأحلام من أوهام.. فلنرفع قبعتنا لها بكل تقدير واحترام.
حسن محمد - القاهرة
assan_h_a@hotmail.com
* ليه يا مصر وأنا اللى فى حبك أجمل أنشودة.. وعن تاريخك وحضارتك كتبت بإيدى عنك أجمل حدوتة.. وعن جمال نيلك وأرضك رسمت فى قلبى أجمل صورة..
 وفى جيشك كنت جندى من خير جنود العروبة.. ليه تعذبى ولادك حتى يلاقوا وظيفة.. واللى يهاجر منهم يلاقى ظروف مهينة..
 والكبير أصبح فى أضيق حال وحاجة.. والمريض بيقول يارب شفاءك ولا أخرج على دابة.. وأطفال فى الشارع يطلبوا العون من المارة.. ليه يامصر دا إحنا أحفاد الفراعنة بتمنالك يا مصر كل خير وتكونى لأبنائك معطاءة!!
محمد مجدى أحمد