ملاكى الوزير

جر ملاكى الوزير
والقانون سيفه يمشى
ع الملك زى الغفير
والعدالة حصن دايماً
للصغير والكبير
مش هيبقى الباشا باشا
واحنا حصلنا الحمير
نفسى مرّة ألقى ونش
جر ملاكى الوزير
نفسى كل الكوسة توْلع
والوسايط تبقى ماضى
والمحافظ لما يمشى ع
الطريق يبقى لينا فاضى
دا اللوح مكتوبة فاضى
واحنا بالخط الكبير
أصل يبقى الباشا قاضى
يعنى من حقه يطير
نفسى مرّة ألقى ونش
جر ملاكى الوزير
نفسى أفتح مرة عينى
ألقى كل شىء نضيف
نص كيلو لحمة ضانى
ينفعوا على كام رغيف
والمكاتب والمصالح
صورة لموظف شريف
بس بطّل مد إيده
والشعار أصبح ضمير
نفسى مرّة ألقى ونش
جر ملاكى الوزير
نفسى يبقى الكل واحد
والقانون يحكمنا واحد
ف المصايب والشدايد
كلنا على قلب مارد
فجر القمقم وفارد
فوق جبينك كل خير
نفسى مرّة ألقى ونش
جر ملاكى الوزير
م. أحمد القداح
ahmed.kaddah_mcc@yahoo.com